Shillong, Nailar 29 : U Chief Executive Member (CEM) ka Khasi Hills Autonomus District Council (KHADC), hynne ka sngi Ba-ar, ula bthah ia ka Tnad Enforcement ka Council, ba kan khynra Trading Licence ia ki dukan madan jong ki bar jylla kiba die mar naduh Motphran haduh Bimola Pharmacy.
Kane ka jingbthah kala mih hadien ba u CEM ha ryngkat ki EM lem bad u Magistrate ka East Khasi Hills bad u Syiem ka Hima Mylliem, kila hiar jurip ia ki nongdie madan kiba die jingdie ha shilynter ka surok na Motphran sha Bimola.
Haba iaren bad ki nongthoh khubor, u CEM ula pyntip “Nga la bthah ia u Superintendent ka Tnad Enforcement jong ka Council ban hiar talasi Trading Licence bad ban tohkit ia kine ki dukan madan jong ki bar Jylla kiba die juti bad kiwei kiwei ki mar. Nga la ai ruh ia ka hukum ba ia kibym don Licence, dei ban weng noh na kitei ki jaka”.
Ula ong ruh “Lada don kino kino ki Khasi kiba leit kam trai ia kine ki dukan ki bar jylla bym don Licence, ki dei ban wan ai jingpynshai hapoh ka Ophis jong ka Council ym ha katei ka jaka ba don ka dukan. Ngin sa peit mano ba wan kam ia kitei ki mar ki mata”.
U CEM ula pynpaw ba ka jingshong dukan madan jong ki bar jylla ki bym ithuh ithaw bad ba khlem Trading Licence kan ym long satia kaba shngain namar yn ym don ba lah ban tip ki dei kiei kine ki briew, ki dei kiba shong ba sah haei bad ki dei kiba na kano ka jaka.
Ula ong, ka Trading Licence ka dei kaba iarap ban pynithuh ia kine ki briew namar kin hap aiti ia ki EPIC, ki Residential Certficate bad kiwei kiwei ki kot ki sla kiba donkam.
Ha kane ka jingjurip la sakhi ba bun ki bar jylla kiba die jingdie ha madan haba kila ioh iaka jingwan jurip jong u CEM kila phet krad bad kila shu ieh kumto ia ki jingdie ki jongki bad wat haba kylli na ki longkmie Khasi kiba shong die waidong kila pyntip ba ki bar jylla kiba shong die juti kila phet naka jingtieng iaka jingshah khynra.
Pule lang ia kane: Ai jingmut u Rangbah Shnong ban pyntreikam noh ia ka NEP ha baroh ki College ka Jylla
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
