Nongpoh, Nailar 23: U Director General of Police (DGP) ka Jylla Dr LR Bishoi, hynne ka sngi Balang, ula hiar sha Ri-Bhoi ban iakynduh ia ki samla pule bad ban ialap pyrshah ia u droks lem bad ki jingktah jong une u jingdih pynbuaid ia u nongdih, ka Iing ka sem bad ka imlang sahlang.
Une u Khliehduh ki Pulit ka Jylla ula ieng ha ka sien ba nyngkong eh nalor ka rynsan ha Ri-Bhoi District, ban ialap pyrshah ia u droks. Une u Heh Pulit ula leit iashimbynta kum u kongsan ha ka jingialang ialap pyrshah ia u droks bala pynlong da ka Tnad Pulit ha Ri-Bhoi College.
Ka jingshimkhia jong ka Tnad Pulit ban pynlong ia kane ka rynsan ialap ha kane ka District ka dei namar ba ka Ri-Bhoi ka dei ka khyrdop ban rung ban mih na ka Jylla bad ruh namar ka jingshem ba kiba bun ki samla kila sdang ban kyrni bad ngop ha une u jingdih buaid, kaba la pynjyllei ruh ia ki kam tuh kam thiem bad kiwei kiwei ki kam sniew.
U Dr LR Bishnoi haba ai jingkren, u la ong ba u drug u dei uwei naki jait jingdih ba ktah ïaka bor jabieng haba pyntip ruh ba ka long kaba jwat haduh katta katta ban dkhat ia u kynjri jong une u jingdih shisien bala ngop bad kyrni.
Une u Heh Pulit u iathuh ba kat kum ki jingkhein bala ioh lum haduh u snem 2019, ki don kumba 2.5 lak ngut ki samla ka Jylla kiba la ngop ha une u jingdih bad kumba 45 hajar ngut ki dei tang na Nongbah Shillong.
U pynpaw ba ka jingtrei shitom ka Tnad Pulit, ka Jylla kala lah ban tehlakam bha ia ka jingjyllei u droks lyngba ka jingioh ban kurup jan manla ka sngi. U pyntip ba u droks ba la ioh kurup haduh mynta ula shongdor haduh T.124 klur lem bad ka pisa kaba la kot haduh T.75 lak.
U Dr Bishnoi ula pyntip ba ka Ri-Bhoi District ruh ka dei kawei na ki District kaba u droks ula jyllei bha namar ba ka dei ka lynti rung bad mih na ka Jylla. Namar kata, ula kyntu ia ki samla pule ba kin kiar lai lum lai wah na une u jingdih bad ban long ki nongsam ia ka khubor ba bha sha ka imlang sahlang bad ki para samla khnang ba yn lah ban rat dyngkhong ia une u jingdih buaid na ka District.
Kiba la iadonlang ha kane ka sngi ki kynthup ia u Giri Prasad Superintendent of Police ka Ri Bhoi, Ishan Gupta Assistant SP, EC Benny Principal ka Ri-Bhoi College, ki heh pulit jong ka Ri Bhoi, ki nonghikai lem bad ki samla pule na katei ka College.
Pule ruh: Mizoram : Iap 17 ngut na ka jingkhyllem ka jingkieng lynti rel ba dang shna
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
 ka Jylla Dr LR Bishoi, hynne ka sngi Balang, ula hiar sha Ri-Bhoi ban iakynduh ia ki samla pule bad ban ialap pyrshah ia u droks lem bad ki jingktah jong une u jingdih pynbuaid ia u nongdih, ka Iing ka sem bad ka imlang sahlang.){kind=link}