Nongpoh, Nailar 12: Ka Joint Action Committee of Land Owners of Shillong Western bypass, Shillong, kala pyrshah jur ia ka jingkam trai jubor jong ka Tnad Meghalaya Energy Corporation Limited (MeECL) ia ki katto katne ki jaka jong ki paidbah ha ka thain Sumer, Ri-Bhoi District.
Ka Joint Action Committee of Land Owners of Shillong Western Bypass ka dei kaba la thaw da ki 80 ngut tam ki trai jaka hadien ba ka Sorkar Jylla ka don jingthmu ban shna ia ka surok Shillong Western Bypass (ka surok ba pyniasoh na Mawmaram sha Lad Umsaw), namar ka jingshah ktah ki katto katne ki shnong ba kynthup ha East Khasi Hills bad Ri-Bhoi District.
Haba kren sha ki lad pathai khubor, u Chairman kane ka JAC uba dei ruh u MDC barim ka Umsning Bah Donkupar Sumer ula pyntip ba ki trai jaka ha Ri-Bhoi ba kynthup ia ka thain Sumer, kila shim ia ka rai ban ieng pyrshah ia ka jingkam nong kynti jong ka tnad MeECL ia ki jaka ha Sumer bad ban dawa ia ka Sorkar ba kan tuklar mardor halor kane ka kam.
U Bah Donkupar ula ong ba kane ka jingkam ka MeECL kala pynbitar lep ia ki trai jaka kiba don kumba 80 ngut tam kiba shong basah ha ka thain Sumer da ki phew phew snem bad kiba don ruh ia ki kot ki sla kiba la dep register hapoh ka Ophis u Deputy Commissioner ne ha ki Ophis ka Dorbar Raid bad ki Dorbar Shnong.
“Ngim pyrshah ia ka jing thmu jong ka Sorkar Jylla ban wanrah ia ka surok na ka bynta ka roi ka par bad ka jingsuk ha ka leit ka wan jong ki paidbah namar ka jingkhim palat ka surok ha nongbah Shillong kumba la sakhi ha kine ki snem ba mynta, hynrei ngi pyrshah ia ka jingkam jong ka tnad MeECL ia ki jaka jong ngi bad ngin iakhun tyngeh ban pynshisha halor ka jinglong trai jaka kam pher wat lada ngi hap ban kiew sha Iinglieh ne Iingsaw da kaba iakhun da ka aiñ”, ula ong.
Ka Kong Tinus Kharsawian, kaba dei kawei na ki trai jaka ka la pynpaw ba kane ka jing kam ka tnad MeECL ka long kaba bakla shaba palat namar ka la shong la sah ha ka jaka jong ka mynta da ki phew phew snem bad ka la dep ruh ban rejister ia ka jaka khlem da don kano kano ka jinghuri hura.
“Hynrei ha kane ka kynti pat ba ka Sorkar jylla ka thmu ban tei ia ka surok, wan mih bluit ka tnad MeECL ban kam ei ia ka jaka jong ka” kala ong haba byrthen ruh ba da leilei kan nym ailad ia kane ka tnad ban shu wan kam ei ia ka jaka jong ka.
Ka JAC ka la rai ruh ban leit buh da ka jingujor sha ka Sorkar jylla ha kine ki khyndiat sngi ban dawa ba kan tuklar ia kane ka jingkam nongkynti jong ka tnad MeECL ia ki jaka puta jong ki nongshong shnong ka thain Sumer bad lada kam don kano kano ka jingshimkhia na ki bor ba dei peit, na ka liang ka JAC kam banse ban shim pat da kino kino ki lad ba tyngeh.
Also read: Pynthymmai Nongkitkam ka UDP : Bat biang u Bah Metbah kum u President, 8 ngut ki Working President
