Shillong, Nailar, 01: Ka Hynniewtrep Youth Council (HYC) hynne ka sngi Baar, kala pynpaw ba dei namar ka jingbym don ka jylla ia la ka State University kaba paka ba kin sa mih ki jinghuri hura haka jingpyntreikam iaka National Education Policy (NEP) ba thymmai ha ka jylla.
“Kine baroh ki jia namar ba ka sorkar jylla kam lah ban leh eiei ban tuklar namar ka jingbym don iala ka jong ka State University. La 50 snem ngim pat don iaka State University kaba biang, la plie iaka Captain Willamson Sangma ha Williamnagar hynrei tang kane kam pat biang namar kam pat treikam haduh mynta. Lada ngi don ia la ka State University kaba ki College ki lah ban pyniasoh kane ka kynrum kynram kan ym jia” ong u Bah Robert Kharjahrin haba iakren bad ki nongthoh khubor hadien ka jingwan iakynduh ia u Myntri ka pule puthi u Rakkam A Sangma.
“Ka sorkar jylla kadei ban kyndit bynriew noh, namar kala mih ka jingeh naka jingpyntreikam iaka CUET ha ka jylla namar ka jingbym don iaka State University la ka jong bad ka jingeh kaba mih mynta na ka NEP kadei namar ka jingbym don iaka State University la ka jong” ula bynrap.
Une u Nongialam ka HYC ula ong ba nangne shakhmat, ym tip kaei kaba ka sorkar pdeng kan leh ha kaba iadei bad ka pule puthi, ki lah ban pynbor ia ki kot pule ne pynbor ban pule ia kaei kaba ki kwah ka ban ym iahap bad ka riti ka dustur ka jong ngi.
“Kane kadei ka por ba ka Meghalaya kan don iaka State University kaba biang nadong shadong bad ngi la dawa naka sorkar jylla ba dei ban buh ia kawei ka Satte University hapoh ka nongbah Shillong, ka Captain Williamson Sangma kaba don ha Garo Hills ka lah biang, hynrei donkam sa kawei ha nongbah Shillong ne ka sorkar jylla kan shu pynbna noh ia kano kano ka College sha ka kyrdan University ban ai jinghikai ha ki Master Degree ne kan tei beit noh da kaba thymmai iaka University” ula ong.
U Bah Robert ula ong ba ha kaba iadei bad ka jingpyntreikam iaka NEP ha ka jylla, kawei ka kynhun kala pynpaw ba ka Meghalaya kadei ban iaid shakhmat bad ka NEP, katba kawei pat ka kynhun kala pynpaw baka jylla kam pat biang bad kane kala pynklumar jingmut ia ki samla pule, ki nonghikai bad ki kmie ki kpa bad ka seng HYC kala hap ban mih shakhmat namar ba kala don ka jingklumar jingmut jong ki nongshong shnong haka jylla”.
“Kawei ka jingklumar jingmut ka long, kumno ha kawei ka jylla ha kajuh ka Skulbah kin don ar jait ki College kiba pyntreikam iaka NEP bad ki bym pyntreikam iaka NEP bad kane kan wanrah iaka jingktah iaka lawei jong ki samla pule bad iaka jingmut jingpyrkhat ka jongki bad kan ktah ruh iaka rukom iadei hapdeng jongki College. U samla pule uba don ha ka college kaba don ka NEP yn sngew ba u don haka College kaba kham biang katba u samla pule uba don ha ka college ka bym don NEP yn sngew ba ym don lawei kaba biang bad kane kan ktah ia ka pyrkhat pyrdain jongu samla pule bad u lah ban sangeh noh shi syndon ia ka jingpule ka jongu” ong u President ka HYC.
Ula ong, watla ka sorkar jylla kam donbor halor jongka NEHU kaba dei ka skulbah jongka sorkar pdeng, hynrei ka sorkar jylla kadei ban tuklar namar kan ktah ia ki samla pule bad ia ki nonghikai jong ka jylla.
“U Myntri ka tnad pule puthi ula pyntip ba ka sorkar jylla kan sa lum iaka jingialang jongka Higher & Technical Council Meeting ha kaba ki khlieh jong ki jaka pule kin donlang ban iakren halor ka jingpyntreikam iaka NEP kaba wat u Vice Chancellor ka NEHU u long kum u Vice Cahirman” ong u Bah Robert Kharjahrin bad ka bynrap ba ka NEHU ka dei ban lum iaka jingialang ia ki Nonghikai bad Principal ban ia pyrkhat arsien ia kane ka kam, namar yn ym lah ban iaid ha ka rukom ban don ki college kiba pyntreikam ia ka NEP bad don ki College ki bym pyntreikam iaka NPP.
Ula ong ruh ba hapoh ka jylla ki don ki College kiba don thik tang iaka Arts Stream, bad don kiba don iaka Commerce bad Science Stream bad ki don tang khyndiat eh ki College kiba don 2 ne 3 tylli ki Stream hynrei ha ka NEP lah ban shim iaka Physics, Economics bad Accounting, kumta lada ka sorkar kam iarap ia kitei ki College kiba don tang kawei ka Stream ban thung ia ki nonghikai kan wanrah iaka jingeh.
Ha kaba iadei bad ka jingiakynduh ia u Vice Chancellor ka NEHU, u President ka HYC ula ong ba u VC ula kular iaka seng ba yn lum ia kawei ka jingialang kaban donlang ki kynhun jongki nonghikai, ki nongmihkhmat naka sorkar jylla, ki nongialam sengbhalang ban iakren ia kane ka kam .
“Lada ka Academic Council jong ka NEHU kam pat mynjur ban pyniaid shakhmat iaka jingpyntreikam iaka NEP, kumno tang ka Executive Council jong ka NEHU ka lahban shim ia katei ka rai” la ong u Nongialam ka HYC.
