Shillong, Naitung 28: Ka Shillong Municipal Board (SMB) ka dang wad iaki jaka ban phah shong iaki nongdie madan kum shi bynta ban pynkylluid bad ban pynkylla iaka thain Khyndai Lad tang kum ka jaka iaid kjat.
Ia kane la pyntip da u Myntri ka tnat Tourism bah Paul Lyngdoh haba iakren bad ki lad pathai khubor haba pyntip ba kiei kiei baroh kila iaid beit iaid ryntih.
“Ban pynlong iaka Khyndai Lad kum ka jaka iaid kjat, ki kam ki jam kila iaid beit iaid ryntih bad ka jingeh mynta ka kynti ka long tang ban ioh jaka naka bynta ban ai shong dukan ia kumba 100 ngut ki nongdie madan kiba la pynrung kyrteng bad ka SMB ka dang leh mynta iaka ba donkam” la ong u bah Paul.
U bah Paul ula ong ba ka sorkar kan nym beh iaki nongdie madan khlem da pynioh jaka iaki ba kin ioh bteng iaka iadie iathied lane ka khaii pateng bad nalor kane ka sorkar jylla ka hap ruh ban bud ryntih iaki ain ka sorkar pdeng (National Act) haba iadei bad ka bha ka miat ki nongdie madan.
“Ngin pynbiang jaka iaki nongdie madan hashuwa ban pynkylla iaka Khyndai Lad kum ka jaka iaid kjat bad katkum ki ain ka sorkar pdeng (National Act), ngi dei ban pyndep ia kane hapoh u bnai Risaw 2023” ula ong.
Nalor kane u bah Paul ula ong ba ka sorkar ka hap ban ai jaka shawei iaki nongdie madan namar lada shu kyndang beit naphang ki nongdie madan ki lah ban leit ujor sha ïing bishar bad kane kan sa ktah iaka jingthmu ka sorkar ban pynkylla iaka Khyndai Lad kum ka jaka iaid kjat.
 haba iadei bad ka bha ka miat ki nongdie madan.){kind=link}