Shillong, Naitung 12: Ka Hynniewtrep Youth Council (HYC) Shella Area Unit hynne ka sngi haka jingdonlang ki paidbah nong shong shnong ka thain Shella bad ki shnong marjan kala pynlong ka jingiakhih daka ba thang ia ki tyngshop jong ka MePDCL bad jong ka sorkar MDA-2.0.
Ia kane ka HYC kala leh namar ka jingbym suidniew ka sorkar bad ka tnat MePDCL ban shim khia halor ka jingthut jong ka bording elektrik kaba la pynlong nongshong shnong ban mad ia ka jingdum bad jingbym ioh bording elektrik tad haduh mynta ka sngi.
Ha shuwa ka jingthang tyngshop, ka HYC ha ryngkat ki paidbah ka shnong Shella bad ki shnong ba marjan, ka la pynlong ia ka jingialang paidbah ha ryngkat ka rah ia ki Dongmusa hapoh shnong Shella.
Haba kren ha kane ka sngi, u Rangbah Shnong ka Shella bah Readerforce Sarubai ula kyntu ia ka Seng ban shimkhia lem ban pynsngew ia ka jingeh ki nongshong shnong ha ki bor ba halor bad u lah pyntip ruh ba na ka liang jong u, u long ba lah kloi ban iatreilang bad ka seng halor kane ka mat.
U General Secretary ka HYC samla Roy Kupar Synrem ula pynpaw ka jingai khublei iaki nongialam jong ka Unit kiba lah pynlong ia kane ka prokram khamtam eh kaba dei ka mat kaba ktah ia ki paidbah bad kham kyrpang eh ia ki khynnah pule jong ka shnong bad ka dong ka thain.
U samla Roy Kupar ula pynpaw ba ka MeECL bad ka sorkar jylla ki kwah ba ki nongshong shnong ka dong ka thain kin leit phai biang sha ka juk jong ka jingdum haba ka pyrthei baroh kawei ka beh sha ka jingshai.
“Kane ka jingeh ki nongshong shnong kam dei kaba thymmai hynrei na ka por sha ka por lah ju pynsgew ha ki bor ba dei peit hynrei ym shim lah iohi ia ka jingkylla na kane ka jingeh bad naka liang ka seng kan nym shongthait hynrei kan buddien bad iai pynsngew ia kane ka jingeh ki nongshong shnong bad lada ki bor ba halor kim sngap ka seng kan sa shim da kiwei pat ki sienjam ba kham tyngeh” la ong u samla Roy Kupar Synrem.
