Shillong, Naitung 12 : U President ka seng Congress u Bah Vincent H Pala hynne ka sngi Balang ula ong ba um don satia ia kano kano ka jingpyrshah ban wan pynpoi lynti rel sha rilum Khasi-Jaintia.
Haba iakren bad ki nongthoh khubor u Bah Pala ula ong “Nga shimet hi ngam don kano kano ka jingsngew thut lada wan ka rel. Hynrei, ngi im ha ka imlang sahlang ha kaba ngi lah ban ia mynjur ia ka jingbym iamynjur”.
Ula ong ba ki karkhana pynmih dew bilat ki pynmih kumba 17 million ton kaba mut 3300 ton ha ka sha sngi, Kane ka mut kumba 50 lak ton u dewbilat la rah na rilum Jaintia sha kiwei pat ki jylla jong ka ri, kumta kan long kaba eh bha ban pynbiang ia ki surok ne iaka jingdheng kali ha ki snem kiban dang wan.
“Lada ngi don iaka rel kan pynsuk shibun ha ka leit ka wan bad kan long ruh kaba shongtad ia baroh haba ki leh ia kino kino ki kam” ong u Bah Pala.
Ula ong ba ka jylla Meghalaya kadei kaba bun tam ia u mawshun hapoh ka dewbah Asia bad bun ki karkhana kin sa nang mih.
“Ngi don ruh ia u dewiong uba bha tam ha ka pyrthei baroh kawei, da kaba peit ia kitei kiei kiei baroh, ngi donkam ia ki jingtei bad ki jingshna ki bapher, ngi donkam ia ka jingbei tyngka, ngi donkam ban iohkam iohjam.Lada ngi peit ha katei ka liang ngi donkam iaka (rel)” ong u Bah Pala.
U Bah Pala ula ong, “Lada phi peit pat ia ka jingpynpaw jong ki sengbhalang ha kaba iadei bad ka jingwan rung kyrthep ki briew nabar, ka long kaba dei namar lada ki wan ki briew nabar kin knieh ia ka kam ka jam, kin shim ia ki marpoh khyndew bad kiwei kiwei na ngi bad ngin ym lah ban kyrda ha ki snem kiban dang wan. Ki don ia ki mat jingpynsngew ha kaba iadei bad kane ka ishu bad dei na kane ba nga ong ba ngi lah ban mynjur ia ka jingbym ia mynjur. Ngim dei ban ong, ba ka jingpynpaw ka jongki ka long kaba bakla, kum ka jaidbynriew kaba rit paid ngi dei ban ioh iaka jingiada. Ngi dei ban ioh iaka jingiada bad ban shah kyntiew ruh ha kajuh ka por kumta ngim dei ban duh noh iaka jingioh jingiada, ka roi ka par bad ka iohkam iohjam”.
U Bah Pala ula ong, “Ka sorkar kadei ban pynlong iaka jingwad bniah ban tip haduh katno ka jingwan rung kyrthep kala ktah jur ia ngi bad haduh katno ngi dang donkam iaka roi ka par” .
Pule lang ia kane: Pynshai u Myntri bap hah wadbniah ka Sorkar ban pynpoi lynti rel ha Khliehriat
