Shillong, Naitung 12 : U Myntri ka sorkar jylla uba dei ruh u Nongaiktien jongka sorkar MDA u Bah Paul Lyngdoh hynne ka sngi Balang ula ong ba ka rai jong ka sorkar jylla ban phah wad bniah ban wanrah iaka lynti rel ha East Jaintia Hills ka dei ka sienjam tang ban ioh khmih bniah ia ka jingmyntoi bad jingduhnong na katei ka projek.
“Ka jingphah wad bniah ka mut ba nyngkong dei tip shwa iaka jingmyntoi bad jingduhnong, kiei ki jingbha bad kiei ki jingsniew. Ka jingshisha ka long ba ka sorkar kala pynbna ban pynlong iaka jingwad bniah kadei ruh ban shim iaka jingsngew na ki kynhun bapher ha kaba yn sa kynthup lang hapoh katei ka jingwad bniah” ong u Bah Paul Lyngdoh haba iakren bad ki nongthoh khubor.
U Bah Paul ula kren ia katei halor ka jingkylli ba ki sengbhalang ki iengskhem ban pyrshah jur ia ka jingthmu ka Sorkar ban wanrah lynti rel ha Khliehriat namar ka jingma na ka jingwan tuid kyrthep jong ki briew kiba nabar.
“Kaba nyngkong eh phi hap ban pyniapher hapdeng ka rel kit briew bad ka rel kit mar, ka ba-ar hap ban peit ruh ia ka jinglong jingman bad kaei kaban shah ktah iaka sawdong sawkun bad kaba lai hap ruh ban peit bniah la kan ktah ia ka jindon paid ki trai shnong bad pynshlur iaka jingwan rung kyrthep beain ki briew nabar- kine kidei ki mat kiba kongsan kiban dei shi bynta jongka jingwad bniah” ong u Bah Paul Lyngdoh.
Pule lang ia kane: Kiew 7 tylli ki karkhana coke be-ain bala shah pynpra, kem 6 ngut
