Shillong, Naitung 07 : Kawei ka kali ki Pulit ka Laitumkhrah Police Station, kala shah wiang ding ha ki briew ki bym lah satia ban tip ki dei kiei, hynnin ka miet shiteng synnia ha phyllaw jong kane hi ka thanad.
Kane ka jingshah wiang ding kala jia ha ka por 12 duna eiei, ong ka khubor ki Pulit.
Kat kum ka khubor la iathuh ba hashuwa kane ka jingjia, kala don ka jingiashoh hapdeng ki khynnah Khasi bad ki bar jylla hakhmat ka Ophis ka Tnad ka Koit ka Khiah ha Bhagyakul bad ha kane ka jingjia, la kynnoh ba ki CrPF kiba iaid pahara ha ka thain, kila tied dusmon ia ki khynnah Khasi khlem da tip ia ka daw.
Kane ka jingjia kala pynbitar ia kiba bun ki paid Khasi ba sah ha ka thain, kiba la iatur paidbah sha Laitumkhrah Police Station ban synran ia kine ki Khynnah ba kin ujor ejahar.
La iathuh dei ha ka por ba kine ki Khynnah Khasi ki dang ujor ejahar kynsan kynsan kila don ki briew kiba wiang ding ia ka kali ki Pulit ba pynieng ha phyllaw ka thanad bad lun maw ia ka Thanad.
Hynrei kat kum ka jingiathuh ki Pulit, kane ka jingiashoh hapdeng ki ar kynhun kala mih namar ka jingkynnoh ba kine ki khynnah Khasi kila khang lynti ban rung sha Bhagyakul.
Ki Pulit mynta ki dang pynlong ia ka jingtohkit ban lap ia ki daw tynrai halor kane ka jingkulmar kaba lam ruh sha ka jing thombor ia ka Thanad.
Pule lang ia kane: Hiar jngoh u Bah Paul Lyngdoh їa ka jingtreikam ka District Social Welfare ha WKH
