Nagaland, Naitung 07 : U Myntri Rangbah ka Nagaland Neiphiu Rio ula pyntip ba u Myntri kam Pohiing ka Ri Amit Shah, ula kular ia ka kynhun ki Nongialam ka Nagaland ba ka Sorkar Pdeng ka dang shong pyrkhat ban pyllait ia ki Khristan bad ki katto katne ki jaka jong ki paid riewlum na ka jingtyrwa pyntreikam ia ka Uniform Civil Code (UCC).
Ha ka sngi Balang, ka kynhun ba 12 ngut ki nongialam na Nagaland ba ialam da u Neiphiu Rio, kila iakynduh ia u Amit Shah ha Delhi bad pyntip ha u ia ki jingsngew jong ki paidbah halor ka jingtyrwa ban wanrah ia ka UCC bad ka jingktah ba kan wanrah khamtam haba phai sha ka Jylla Nagaland kaba dei ka Jylla ki Khristan bad ka Article 371 (A) jong ka Riti Synshar ka Ri.
Ka Uniform Civil Code ka dei kawei na ki ishu ba hakhmat eh ha ka mat treikam jong ka Bharatiya Janata Party (BJP), ka bym pat lah pyntreikam haduh mynta.
Dang shen, kala don ka jingiakren kaba jur halor ka UCC hadien ba ka National Law Commission kala pan ia ki jingai jing mut halor ka UCC bad kala ioh pdiang haduh kumba 2 million eiei ki jubab.
Katba u Myntri Rangbah Duh ka Ri Narendra Modi ula pynpaw ia ka jingkyrshan ia ka UCC, ka Liang Pyrshah bad ki Kynhun Niam bapher bapher lem bad ki paid riewlum kila pynsngew ia ka jingsngewkhia halor ki jingktah jong kane ka Ain.
Haba kren halor ka jingiakren iasuk bad ki kaikhlaw Naga kaba dang iaid mynta, ka Kynhun kala buh hakhmat ki Nongialam na Delhi ba ki dei ban pynbeit bad pynkut noh kham kloi ia ka jingiakren halor ka synshar khaddar ki Naga namar kala shu sahteng la slem bha.
Kane ka kynhun kala iakren ruh halor ka jingtywa ka Sorkar Pdeng ban pynkha ia ka Autonomous Council bala tip kum ka Frontier Naga Territory, ka ban kdup ia hynriew tylli ki Eastern District ka Nagaland. Ia kane ka jingtyrwa la buh kum shibynta na ka jngdawa ai Jylla la ka jong da ka Eastern Nagaland People’s Organisation (ENPO).
Pule lang ia kane: Pynthikna ka Sorkar ban nym shah pyntreikam ia ka UCC ha Jylla
, ka bym pat lah pyntreikam haduh mynta.){kind=link}