Shillong, Naitung 03: Ka Khasi Student Union (KSU) South West Khasi Hills District hynne ka sngi Nyngkong, kala kynnoh ba ka tnat Anti Narcotic Force Team (ANTF) ki Pulit ka South West Khasi Hills ka dei ka bym lar kam namar haduh mynta kim pat ioh kem wat tang uwei ruh u nongkhaii Drok hapoh ka District.
Ka KSU South West Khasi Hills kala phah tuklar ia u Myntri Sorkar Bah Paul Lyngdoh halor ka jingsdang kynrei u drok hapoh ka District baroh kawei, kaba la wanrah ruh ia ka jingjyllei ki kam sniew ba bun rukom.
Haba kren sha ki lad pathai khubor u President ka KSU SWKHD Forwardman Nongrem ula kam ba haduh mynta ka jing ioh kem iaki nongkhaii drok ha South West Khasi Hills ka dei namar ka jingtrei shitom ki nongialam shnong, ki Seng Samla Shnong bad ki sengbhalang bapher bapher.
“Ka thain kala sakhi ka jingjyllei ka kam khaii bad dih droks hynrei ngim pat ju lap ba ki Pulit ANTF kin ioh ban kem iaki briew ba pynpoi iaki Drok shapoh ka District, shaei kita ki Pulit ANTF bala pynkup bor daka ain ban rat dyngkhong ia u drok” buh jingkylli u samla Forwardman.
Une u Samla ula ong ruh ba haka jingshisha, ka jingdon jong ki Pulit ka ANTF kan dei ban iakhun pynduh jait ia u drok hapoh ka imlang sahlang hynrei kumba paw mynta, ka ANTF kadei tang ka kyrteng namar iaka jingkem iaki ba khaii drok la hap ban shim khia hi daki nongialam shnong, ki seng samla bad ki sengbhalang bapher bapher.
“Dei ban pynkhlain iaka ANTF ym ban shu don tang ka kyrteng hynrei dei ruh ban kem naphang iaki ba khaii drok hapoh ka district baroh kawei” ula ong.
Haba kylli halor ka jingwan kynduh ia u Myntri, une u Nongialam ka KSU ula iathuh ba ka seng kala kyntu ia u Mytri ban thaw noh daka Rehabilitation Centre jong ka sorkr hapoh ka District ka ban sumar lem iaki ba kyrni drok hapoh ka District.
U bah Forwardman ula ong ba ka jingdon daka Rehabilitation Centre ban pyniaid daka sorkar kan long ka jingiarap ia kito kiba kyrni Drok ba wan naki longing baduk ba kin ioh ia ka jingsumar ei khnang ba kin lah ban wan phai noh shaka jingim ba thymmai.
Ula ai jingmut ruh iaka sorkar jylla ba kan thaw da ka District bad Block Level Committee ki ban kynthup lang iaki bor shnong ba kin khmih haba iadei bad ka jingjyllei u drok hapoh ka District.
Pule ruh: Dang tohkit ki Bomb Squad ia ki tiar ba mih jingbthei ha Smit
