Shillong, Naitung 03 : Ki Pulit ka kynhun Bomb Squad bad ka CSU ki dang pynlong mynta ia ka jingtohkit ban tip tynrai ia ki tiar ba pynmih ia ka jingbthei ha kawei ka Iing ka Lumkynsai, Smit hynne ka sngi Nyngkong, kaba lam sha ka jingiap jong uwei u Rangbah.
U Superintendent of Police ka East Khasi Hills Bah S Nongtnger u pyntip ba ha kane ka jingjia kaba la jia ha ka por 12 baje shiteng sngi, u Bah Pynsuklang Khongwir uba don ha jingthiah pang, ula iap hashen.
U pyntip ba ka jingbthei ka long kaba la jam bha haduh ba kala pynjulor ia katto katne ki kamra jong ka mala ba nyngkong hapoh kane ka Iing.
U SP u iathuh ba ha ka jingtohkit, ki bahaiing hasem kila pyntip ba une u rangbah ba khlad u dei uba dang shu dep leh ia ka spinal surgery ha kine ki arbnai bala leit noh bad ula shu thiah beit ha jingthiah. Kila pyntip ruh ba une u rangbah ula pyrshang ruh ban dkhat jubor iala ka jingim haduh arsien kynthih.
“Ha ka jingtohkit ia ka jaka ba mih ka jingbthei, lap lap ia ki lyngkhot lyngkhai kiba dei ki thymmai jong kane ka jingbthei. Ka kynhun Bomb Squad bad ka kynhun CSU ki dang tohkit ia ki daw jong ka jingbthei” ula ong.
Ki Pulit kila register case halor kane ka jingjia bad ka jingtohkit mynta ka dang iaid shakhmat.
Pule ruh: Thalain ka Megh High Court ia ki Harijan ba leh shalak ia ka Sorkar bad ka Iingkashari
