Shillong, Jylliew 18: Ka Shnong Pyndengrei, Nongstoin, kala iam pangnud halor ka jingkhlad kyndit jong I Nongrwai ba don sap Cafinia Nongsiej bad I Para Maianylla Nongsiej, kiba la duh noh ia ka jingim na ka jingtwa khyndew ha ka step sngi Saitjain ha Nongstoin.
Kine ki arngut ki shipai ki dang iohthiah lyngngai ha ka por ba twa kynsan ka kyndew kaba la wan ban taplup ia ki. La pyntip ba ha kane ka por ba jia kane ka jingjia, u Kpa jong kine ki arngut ki Khun uba iadonlang hapoh IIng, ula lait ban mih tang da ki jingmynsaw malu mala hynrei I Cafinia bad I Maianylla kila shah taplup ha ka khyndew.
I Cafinia, Iba dei i Dkhot ka Tarari Kid Choir, I dei I Nongrwai I ban dang kiew bha bad iba la pynkhreh ruh ban pyllait sa ia kawei ka jingrwai ba thymmai ha ka taiew ban wan.
I Cafinia ba dang 15 snem ka rta bad ba dang pule klass X ha St. Peter’s Higher Secondary School, Nongstoin, I don ia ka lawei kaba don jingkyrmen bha bad ila pyni iaka jingkiew arsut jong I kum I Nongrwai bad ruh kum I samla pule. Hynrei, ka jingnang phuh jong I ha ka rwai ka siew kala shah dkhat noh shiteng por.
I Cafinia iba dei I Khun u Bah Alexander Lyngdoh bad kong Beautiful Nongsiej, I dei iba la iatip bha kum halor ka jingdon ia ka sur angel haba rwai ia ki jingrwai Gospel kaba la ktah ia ka mynsiem jong kiba bun kiba iohsngew ia ka sur jong I bad ki jingrwai jong ka Tarari Kids Choir.
Ki jingrwai kiba la paw bha jong ka Tarari Kids Choir ba la iashimbynta lang da I Cafinia Nongsiej ka dei ka “You Say” bad ka jingrwai ba I iashimbynta khatduh eh bad kane ka kynhun rwai ka dei ka “Mynsiem ba dang lung”.
Ka long ka jingsngewsih ba ia ka sur I Cafinia un ym iohsngew shuh hynrei ka jingkynmaw ia I kan dang iai im ha ka dohnud jong I paralok, ki bahaiing hasem bad ka imlang sahlang.
Watla ka Shnong kala mad ia ka jingduhnong kaba khraw, ka jingkynmaw ia ki jingrwai ba lung mynsiem jong I Cafinia kin dang iai bteng ban ktah ia ki mynsiem jong kiba ithuh ia I bad kumjuh ruh ia kiwei ki ban sa nang iohsngew. Ka jingim jong I ka lah ban kut noh hynrei ki jingrwai kin iai neh shirta.
Pule ruh: Lap ki Khynnah iaka metiap khunlung bala thang hajan Lum Jingthang briew
