Shillong, Jylliew 14: Ka Iingkashari Meghalaya High Court hynne ka sngi Balang, kala bthah ia ka Sorkar Jylla ban pyllait ia ki hospital na ka jingpynlip bording.
Haba shong bishar ia ka PIL halor kane ka kam, ka Division Bench ba kynthup ia u Chief Justice Sanjib Banerjee bad Justice W Diengdoh kala ong “Ka Sorkar Jylla ka dei ban pyrshang katba lah ban pynthikna ba wat lada poi biang ka khep ban hap pyrrkhing ia ka jingsam bording namar ka jingduna pynmih bording, ki hospital ki dei ban lait na ka jingpynlip bording lane dei ban don ia ki lad kyrshan kiba lah banlong da ki generator diesel bala buh ia ki hospital ba kin treikam khlem kano kano ka jingpynthut”.
Ka Sorkar Jylla kala pyntip ba ki Hospital kiba heh kila lait na ka jingpynlip bording haba pyntip ba kine ki jaka sumar ki dei kiba la tan ia u bording na u lain uba khlain (high tension feeder). La paw ba wat ka Civil Hospital ha Shillong kam shym ioh ia ka bording na u lain ba khlain ban pyndap ia ka jingdonkam bording jong baroh kawei ka hospital.
Ka Sorkar Jylla kala pyntip ruh ba ka North Eastern Indira Gandhi Regional Institute of Health and Medical Sciences kala lait na ka jingpynlip bording.
Ha kajuh ka por, ka Iingkashari kala bthah ia ka Sorkar Jylla ban ai ia ka kaiphod halor kane ka kam shuwa ka sien shong bishar biang, ka ban long ha ka 5 tarik u Naitung.
