Shillong, Jylliew 13: Ka tnad Disaster Management ka Sorkar Jylla kala pynmih ia ka jingbthah ba kyntu ia ki paidbah ba kin long kiba phikir bha ialade na ka jingther u slap, jingpom pyrkhat bad ka jingtied leilieh hapoh ka Jylla.
Kylleng ki bynta jong ka Jylla kila mad ia ka jingioh slap kaba jur bad ka jingpom pyrkhat ha kine ki khyndiat sngi bala leit noh, kaba la pyntngen ia ka mariang na ka jingshit kyrnad bad jingpum pum ha baroh kine ki bnai bala leit noh.
Ha ka sngi Ba-ar, ka suin bneng kala sop da u lyoh, jur ka slep bad ka jingther u slap ha ki katto katne ki bynta jong ka Jylla.
Kat kum ka kyrwoh bala pyllait da ka Tnad DIPR, la pyntip antad ba katto katne ki jaka jong ka Jylla ki lah ban ioh ia u slap uba jur ha ryngkat u pyrkhat.
Ka jingbthah kala kyntu ia ki nongshongshnong ka Jylla ba kin bud ia ki kyndon jingbthah ha kane ka samoi ba mynta.
-Ki briew kiba im hajan jong ki Wah bad ki Wahduid la bthah ba kin da phikir bha ha kane ka aiom slap namar ka lah ban don ka jingwan kynsan ka umsaw ha kum kine ki jaka.
– Kala kyntu ia ki paidbah ban kiar na ka jingleit shala jong ki jaka, ban jam lyngba ki wah bad ban kiar na ki wahduid, ki nala bad ki culvert lem bad kiwei kiwei.
-La bthah ia ki briew ba kim dei ban niah ia ki kali lyngba ki jaka ba shlei um bad ban kiar ruh ialade na ki nar post elektrik khnang ba kin lait na ka jingshah lympat bording.
-La bthah ia ki Khynnah skul bad College ba kim dei ban jam lyngba na ki wah badki wahduid ha kane ka aiom ba jur slap.
– Kumjuh ruh, la kyntu ia ki nongshangkai pyrthei ba kim dei ban iatur shajan jong ki Wah, ki wahduid bad ki kshaid haba ki wan jngoh ia kine ki jaka shangkai pyrthei.
