Shillong Jylliew 12: U Myntri ka Tnad Social Welfare Bah Paul Lyngdoh hynne ka sngi Nyngkong, ula pyntip ba ka sorkar jylla kala ai jingmynjur iaka Draft Policy jong ka Drug Reduction Elimination and Action Mission ne ka DREAM Project kaba dei ka sienjam ban pynlong iaka jylla Meghalaya kaba lait na u Drug.
“Ka mat kaba hakhmat eh kaba ngin pynleit jingmut mynta kadei halor ka ‘DREAM’ project ia kaba la pynbna paidbah naduh u snem ba la dep. La mang T.5 Klur na ka bynta ban pynsaphring ia ki khubor bad ki jingtip ban pynlong ia ki jingpynsngewthuh paidbah lyngba katei ka DREAM Project” ong u Bah Paul Lyngdoh haba iakren bad ki nongthoh khubor.
Ula ong, ba ka jingdih drug ki khynnah bad ki samla kala kiew sted bha ha ka jylla bad kane kala pynlong iaka sorkar ba kan pynthymmai iaka jingkular ka jongka ban iakhun tyngeh pyrshah ia kane ka kam sniew bad ban rat dyngkhong ia ka jingdie drug bad ka jingktah une u jingdih pynbuaid ia ka imlang sahlang.
U Myntri Sorkar ula iathuh ba u Mission Director bad ka kynhun ka jong u kin ai ka jingkyrshanba pura iaka sorkar bad ban iatreilang bad baroh ki tnad sorkar kiba ia don bynta lang bad katei ka ishu.
“Nga pynthikna ba ngin trei borbah ban rat dyngkhong ia kane ka jingeh kham kloi namar ba kala ktah jur iaka imlang sahlang bad kala buh ruh ha ka jingma iaka jingshngain jong ki nongshong shnong” ong u Bah Paul.
Ula ong ruh ba ka jingdon ki nongdih drug haka jylla kala jur bha bad la dep ban ithuh ruh ia ki 7 tylli ki District jong ka Jylla kum kita ki ‘Hotspot’ ne kiba jur ka jingdih bad jingdie be-aiñ ia u drug.
Ki 7 tylli ki District kiba la ithuh kum ki Hotspot ki kynthup ia ka East Khasi Hills, East Jaintia Hills, West Jaintia Hills, Ri Bhoi, West Garo Hills, West Khasi Hills bad South Garo Hills bad la ithuh ruh ia ki shnong ki tahw kiba don ha kitei ki District kiba jur ka jingpyndonkam ia u Drug.
U Bah Paul ula iathuh ba hapoh East Khasi Hills, ki shnong ki thaw kiba jur ka jingpyndonkam ia u drug ki kynthup ia ka shnong Madanriting, Jhalupara, Laitumkhrah, Nongthymmai, Polo, Nongmynsong, Mawlai, Mawprem, Lumdiengjri, Iew Mawlong, Mawngap, Mawryngkneng bad Pynursla.
