Shillong, Jylliew 09 : Ka Jylla Meghalaya mynta u snem kala ioh slem bha ia u slap bad hynne ka sngi Thohdieng, u slap uba jur bha ula pynshlei um ha kiba bun ki jaka ka nongbah Shillong, kaba la ktah ia ka leit ka wan ki paidbah.
Ki jaka them jong ka Shnong Pynthorbah, Pynthorumkhrah, Laangkyrding bad Nongmensong, kila shah ktah jur bha ha kane ka jingshlei um.
Hynrei kumba long manla u snem, ka jingshlei um ha kine ki jaka kam dei namar ka jingheh ki Wah ne poi umsaw hynrei ka dei namar ka jingbym biang ki nala ha kine ki Shnong, kiba khang lynti ia ka um ba kan iaid lynti.
Ka iaid ka ieng jong ki kali bad ki briew ha kine ki jaka ka Nongbah kala sangeh namr ka jingtap lut ka um ia ki surok bad ki lynti iaid.
Manla u snem ba jur u slap ba tang da ki kynta, ki nongshongshnong ka Pynthorbah, Pynthorumkhrah, Langkyrding bad Nongmendong ki ju mad beit ia ka jingshlei um. Ki bor Shnong haduh ki bor Sorkar kila lap ia ka jingeh ba kine ki shnong ki iakynduh hynrei haduh mynta kam shym la don satia kano kano ka sienjam ban tehlakam noh ia kane ka jingshlei um.
Kat kum ka jingpynbna ka India Meteorological Centre ka Sorkar Pdeng kaba don ha Guwahati, la pyntip ba ki Jylla ka thain shatei Lam Mihngi kynthup ka Meghalaya, kin sa ioh ia u slap uba jur bha ha kine ki san sngi ban wan.
