Shillong, Jylliew 03 : Ka Khun Hynniewtrep National Awakening Movement (KHNAM) hynne ka sngi Saitjain, kala pynpaw ba ka long kaba kloi ban iatreilang bad ka United Democratic Party (UDP) bad ka Hill State People’s Democratic Party (HSPDP) lada ki mih noh na ka Sorkar MDA ba ialam da ka NPP.
“Lada ki (UDP bad HSPDP) kwah ia ngi ban iatreilang, kin hap ban mih noh na ka MDA” ong u Working President ka KHNAM Bah Thomas Passah haba iakren bad ki nongthoh khubor hadien ka jingialang jong ka General Council ba long hynne ka sngi ha Jaiaw.
Ula kren ia kane halor ka rai ba dang shen jong ka UDP bad HSPDP ban pynkhlain ia ka jingsngew ieid seng riewlum da kaba thung ia ka Regional Democratic Alliance (RDA).
“Hynrei katba ki kjat kynthup ki Khlieh bad ka met jong ki, ki dang don ha ka MDA bad ruh ha ka North East Democratic Alliance (NEDA), kam mih satia ka jingkylli ia ngi ba ngin iatreilang bad ki, kam lah long hi ruh” ong u Bah Passah.
Ha kane ka sngi, ka KHNAM kala jied biang ia u Bah Pyndapborthiaw Saibon kum u President ka KHNAM, Bah Thomas Passah kum u Working President, Bah M Marpna kum u Vice Presdient bad James A Neng kum u General Secretary nalor kiwei kiwei ki Nongkitkam bad Executive Member jong ka samoi 2023-2026.
Ha kane ka jingialang, ka KHNAM kala iakren ruh halor ka jingdawa pyntreikam ia ka Inner Line Permit (ILP), ka jingpynrung ia ka ktien Khasi ha ka khyrnit ba phra ka Riti Synshar ka Ri, ka kam iakajia pud, ka kam rung kyrthep ki mynder, ka jingkiew ki kam bamsap, ka jingpynioh la ka jong ka Civil Service Cadre ka Meghalaya bad kiwei kiwei.
