Shillong, Jylliew 02 : U Myntri ka Tnad bording AT Mondal ula pynpaw ia ka jingkhuslai halor ka jingnang ring tyrkhong jong ka pung Umiam bad ong ba lada ka um ka dang hiar sha 5 phut, ka jingeh kaba khraw kan wan ha ka Jylla.
“Ka jingdon jong ka um ha pung Umiam ka dei kaba duna tam ha ka histori jong kane ka pung. Ka um kaba don mynta ka long satang 3170 phut. Lada duna sa 5 phut, ka mut ngi la don ha ka jingeh…ngin ym lah than ban pynmih bording. Ki Unit jong ngi kila iaid tang katto katne por mynta bad ngi hap ban ap ia ka um ba kan lang biang”.
Namar ka jingioh duna slap jong ka Jylla mynta u snem, u Myntri ula ong ba ka Sorkar kala wad ia ki lad ki lynti kumno ban leh eiei ia shipor halor kane ka jinglong jingman ba mynta bad ha kajuh ka por, kan sa shim ruh ia ki sienjam ka ban neh slem khnang ba hadien habud ngin ym mad shuh ia kum kane ka jingeh.
U Mondal ula pyntip ba ka Sorkar kala pyrshang ban wanrah noh kham kloi ia ki katto katne ki project khnang ban lah weng noh ia kane ka jingeh.
“Man ka sngi ngi donkam haduh 6.6 lane 7 million unit ka bording. Ngi pynmih bording mynta nalade tang 1.5 million unit…..kaba tam ka wan na kaba shu thied bad na ki bank” ula ong.
“Ngi ai khublei ia ka Iingkashari Meghalaya High Court kaba la ai jingbthah ia ngi ba ngi lah ban thied ia ka bording bad sa ai pat sha u paidbah” ula ong haba bynrap “Hynrei kam dei ba ngi thied ha ka dor ba rem bad ong ia ki nongpyndonkam bording ba kin hap siew ha ka dork aba rem namar kam dei ka MeECL ba buh ia ka dor lane ka Tnad bording, hynrei ka dei ka State Electrity Regulatory Commission”.
“Namar kata, ngi la buh ia ka jingkyrpad sha ka Commission bad ngi dang ap mynta la ka mynjur ne em” ula bynrap.
