Shillong Jylliew 02: Ka KSU Bengaluru Unit kala maham ia ki samla pule na Meghalaya kiba thmu ban leit pule ha Karnataka khamtam ha Bengaluru ba kim dei ban shah pynngop ha ki ‘Agent’ kiba tyrwa ba kin pynioh jaka pule ia ki samla Khasi ne ban pynioh kam iaki khlem da wad ia ki jingtip kiba thikna.
“Ki samla Khasi kiba don jingthmu ban wan bteng iaki jingpule ki jongki sha Karnataka khamtam ha Bengaluru, ki dei ban husiar bad phikir bha ba kin nym ngop ha ki Agent kiba lah ban shukor laiphew jait” ong u samla Donboklang Nongphud President KSU Bengaluru Unit bad u samla Younidame Suchiang, General Secretary.
Ula ong ba ki Agent ki ju kam ba ki jaka pule kaba ki mihkhmat ki dei kiba bha bad kiba la ioh jingithuh na ki bor Sorkar hynrei bunsien la lap pat ba kine ki jaka pule ki dei ki bym ithuh da ki Council ne ka Sorkar nalor ka jingbym biang ki jaka sah, ka rukom ai jinghikai, ka jingshim kabu ha ki jingsiew ia ki baipule bad kiwei kiwei.
“Kine baroh ki buh ia ka lawei ki samla pule Khasi ha ka jingjot bad jingma kaba ktah ruh ia ki kmie ki kpa ki jong ki” kila ong.
Kine ki nongialam kila pynpaw ba ka seng kala iohpdiang iaki jingujor jan man ka por na ki para Khasi kiba wan wadkam sha Karnataka ha ki kyrdan bapher bapher, halor ki jingeh kaba ki iakynduh ha ki jaka trei ki jongki namar kim sngewthuh ia kata ka ‘Bond’ bad ka ‘Agreement’ kaba kila iateh bad ka kompani.
Ka KSU ka kyntu ia baroh ki samla, ba hashwa ban ngeit ia kino kino ki Agent ba kular jaka pule ne jaka trei ha Karnataka ki dei ban da tih bniah shwa shaphang kata ka jaka ai jingpule lane ka jaka ai jingtrei.
“Ki para Khasi ba lada kim ioh ki jingtip ba thikna halor kitei haneng ki lah ban kylli ne wad jingtip na ki dkhot jong ka KSU Bengaluru Unit lyngba ki dkhot jong ka KSU kiba don ha ka thaiñ shatei lam mihngi. Ki paid Khasi kiba don kano kano ka jingeh lane kiba kwah iaki jingtip kin sngewbha ban iakren bad ki dkhot ka KSU Bengaluru Unit lyngba ki Page jongka ha Facebook bad Instagram” kila ong.
