Shillong, Jylliew 02: Ka 2nd Meghalaya Open Table Tennis Cash Prize Tournament 2023 kala sdang hynne ka sngi Thohdieng ha kaba ki nongialehkai naduh kiba dang rit haduh kiba la heh, kila iashimbynta ha kane ka jingiakob kaba ar sngi.
Ia kane ka jingiakob la plie pyrda da ka Deputy Commissioner of East Khasi Hills, ka Rosetta M Kurbah kum ka kongsan ha ryngkat ka jingdonlang u Rangbah Shnong ka Laban Bah Edward Kharwanlang kum u kongsan symbud, u Bah Sammy Myrthong, President jongka Laban Sports Club bad kiwei kiwei.
Ka Kong Rosetta M Kurbah haba ai jingkren kala ai mynsiem ia ki nongialehkai ba ki dei ban pynleit jingmut ha ka thong kaba ki don khnang ba kin lah ban long kiba jop bad kala ong ba ki nongialehkai ki dei ban don ia ka jingngeit kaba skhem halade bad ban don ruh ia ka mynsiem jong ka jingiai shah.
Ha kane ka jingiakob kila don 72 ngut ki nongialehkai kiban iakhun ha ki kyrdan bapher bapher kiba kynthup ia ka Under-15 Boys Singles, Men’s Doubles, Under-19 Boys’ Singles, Veteran Singles (40 snem shaneng), Veteran Doubles (40 snem shaneng), Men’s Singles bad Women’s Singles.
Baroh ki nongialehkai kin ioh pdiang iaka Momento kum ka dak jong ka jingiashimbynta ha katei ka jingiakob bad yn pynlong ia kane ka jingialehkai da kaba bud ryntih iaki kyndon jong ka Table Tennis Federation of India (TTFI).
Kin don ruh ki Refree kiba la tbit bha kiban pyniaid ia kane ka jingialehkai bad ban peit thikna ba ka rukom ialehkai kadei ban long katkum ki kyndon kiba la buh da ka TTFI.
