Nongpoh, Jylliew 02: Ka Ri-Bhoi Dorbar hynne ka sngi Thohdieng, kala pynbna ia ka rai ba ha kane ka kynti ba mynta, ia ka jingrakhe halor ka jingioh District la ka jong, yn pynlong noh ha man ki C&RD Block jong ka Ri-Bhoi.
Ka Ri-Bhoi Dorbar kala pyntip ruh ba ia ka jingrakhe dap 31 snem jong ka Ri-Bhoi District, kaba ju long ha ka 5 tarik Jylliew manla u snem, yn pynlong noh ha ka 4 tarik Jylliew namar ka jingiatakhuh bad ka Sngi U Blei.
Haba iakren bad ki lad pathai khubor, u Secretary ka Ri-Bhoi Dorbar Bah GS Shadap, ula pyntip ba ka jingpynkhreh ia kane ka jingrakhe kala iaid shaid shaid haba pynbna ba ia kane ka sngi lehkmen yn pynlong ha baroh 4 tylli ki C&RD kata ha Bhoirymbong Block, Umsning Block, Umling Block bad ha Jirang Block nalor ka jingrakhe ha Nongpoh kaba dei ka District Headquarter.
“Ngi la shim ia kane ka rai namar naduh ba ka Ri-Bhoi ka ioh District ha u snem 1992 kat haduh u snem 2022, ia kane ka jingrakhe la ju pynlong beit thik tang ha District Headquarter bad ki paidbah na ka thain Eastern Ri-Bhoi bad Western Ri-Bhoi ki ju ioh ban iadonbynta lang” ong u Bah Shadap.
“Ngi dap da ka jingsngewkhia ia kane bad la pynlong ia ngi ban shim ia kane ka rai “ula bynrap.
U bah Shadap ula ong ruh ba haba kynmaw ia kane ka sngi, ka Ri-Bhoi Dorbar ka pynkynmaw ruh ia ki Khun ka Ri-Bhoi ia ki riew radbah kiba don bynta ha ka jingpynioh District ia ka Ri-Bhoi ba kynthup ia ki Nongialam ka District Demand Committee bala khlieh da u Bah JD Rymbai, Myntri Rangbah barim ka Jylla ( Bam Kwai ha Dwar U Blei) kum u Chairman, bah RR Makdoh kum u Secretary bad ruh ia u Bah D.D Lapang uba long Myntri Rangbah ha katei ka por.
Ka Ri-Bhoi Dorbar ka khot ka wer ia ki paid Nongshongshnong ka Ri-Bhoi ban iamih ryntih ha kane ka sngi ha kaban iashim bynta lang ha ka jingrakhe dap 31 snem jong ka Ri-Bhoi District.
