Shillong, Jylliew 2: Ka Mawlai bad Khliehmawlieh kila pynkut iaka jingiakhun ka jongki hynne ka sngi da ka jingjop bad ban ioh rung syndon sha ka Semi Final jong ka Meghalaya State League 2023.
Ka Khliehmawlieh kala pynliem iaka Warima Youth Club da 3-1 kol ha ka Group D kaba la long ha Chandmari Ground Tura.
Ka Warima kala ioh ban thep kol nyngkong lyngba u Akim R Sangma ha ka minit kaba 11 hynrei ki rangialehkai ka Khliehmawlieh kila nang ialehkai bha naduh kane ka khyllipmat bad kila ioh ban thep ia ka kol lyngba u Shelbikstar Kharshilot ha ka minit kaba 34 bad 52 bad Lenny Kravity Lyngdoh ula ioh ban thep ia ka kol ha ka minit kaba 73.
Ha ka jingiakhun ha Shillong, ka Mawlai kala thep haduh 12 kol pyrshah iaka Seng Samla Laitryngew ha kaba u Donlad Diengdoh ula ioh ban thep haduh 5 kol ha ka minit kaba 15, 28, 49, 58 bad 77. Nalor kane u Dajiedlang Wanshnong ula ioh thep ia ka Hat trick ha ka minit kaba 18, 31 bad 39 katba u Robert Khongriah ula thep ia ka kol haka 11 bad 62 minit bad u Kenstar Kharshong ula thep ha ka minit kaba 13 bad 79.
Ha ka jingiakhun ha Jowai ha ka Group B ha Kiang Nangbah Stadium, ka Niaw Wasa United kala iakhaid noh bad ka Sein Pynbhalang da 3-3 kol.
U Paiabanteiskhem Bhoi jong ka Sein Pynbhalang ula ioh ban thep ia ka kol ha ka minit kaba 14 hynrei ka Niaw Wasa kala ioh ban pyniakhiad lyngba ka kol kaba la thep da u Enrigue Malvin Marshra ha ka minit kaba 26.
Ka Sein Pynbhalang kala ioh biang ban thep ia ka kol kaba ar ha ka minit kaba 28 lyngba u Sambiang Wara Wet hynrei hadien kane u Civility Khongmalai u la shut iaka Free Kick bad thep ia ka kol haka 41 minit bad kane ka jingiakhun haka kylla step kala kut ha ka jingiakhaid.
Ha ka kylla miet, ka Niaw Wasa kala ioh bun ki lad ban thep kol hynrei dei ha ka minit kaba kaba 52 ba u Buromlangki Salahe ula ioh ban thep ia ka kol bad katba ka por kala nang iaid la i kumba ka Niaw Wasa kan jop ia kane ka jingiakhun hynrei ka Sein Pynbhalang kala ioh iaka Penalty haka minit kaba 88 bad u Paiabanteiskhem Bhoi khlem da pynlehnoh ei ia kabau ula thep ia ka kol.
Ha ka jingiakhun ha Mawkyrwat, ka Pyndengrei kala jop ha ka sien kaba nyngkong ha ka MSL hadien ba kala mad iaka jingrem haduh 4 sien kynthih.
U Silverstar Thongni ula ioh ban thep ia ka kol ha ka minit kaba 22 na ka bynta ka Riangdo bad hadien kane u Alandonal Sohlangpiaw ula ioh ban thep 2 kol ha ka minit kaba 54 bad 62.
Ka jingiakhun ha ka Group A ha Shillong kan long hapdeng ka Jyntru pyrshah iaka Langsning, ha ka por 3 baje mynsngi.
Ha ka Group B ha Jowai, ka Youth Club Pdengkarong kan iakhun pyrshah iaka Rangdajied United haka por 2:30 mynsngi.
Ha ka Group C ha Mawkyrwat, ka Seven United kan iakhun pyrshah iaka Shillong Lajong ha ka por 3 baje mynsngi bad ka jingiakhun ha ka Group D ha Tura kan long hapdeng ka Chipakkore pyrshah iaka Wasa FC ha ka por 3 baje mynsngi.
