Shillong, Jylliew 02 : U Myntri ka Tnad C&RD Abu Taher Mondal hynne ka sngi Thohdieng, ula pyntip ba haduh mynta ka Sorkar kam pat don jingthmu satia ban pynkha ia ki C&RD Block ba thymmai hapoh ka Jylla.
“Ia mynta hi, kam pat don ka jingtyrwa ban pynkha Block thymmai. Kumba nga la dep kren teng, kane ka dei ka kam kaba shong ha ka jingsngew donkam jong ka Sorkar ban pynkha ia ka Block thymmai” ula ong.
U Myntri u pyntip ba ka Sorkar kala ioh pdiang haduh 5-6 tylli ki application ban pynkha ia ka Block thymmai hynrei kam pat shym rai satia halor kine.
“Ngi la ioh pdiang ia ki application ban pynkha thymmai hynrei na ka Sorkar hi kam pat don ka jingtyrwa ban pynkha” ula bynrap.
