Shillong, Jymmang 30 : Ka Ophis ka Deputy Commissioner ka East Khasi Hills, ka pyntip ba ka Sorkar India kala aipor ia ka Sorkar Meghalaya ban pynbiang ryntuh noh mar mar ia ki Aadhaar jong ki Nongshongshnong haba buh kyndon ba ki briew ki bym don ia ka Aadhaar, kin duh lut noh ia baroh ki song jingmyntoi (skhim).
Kat kum ka jingpyntip ka Deputy Commissioner, ka jingaipor ka Sorkar India ka long naduh ka Aadhaar jong ki Longkmie kiba armet, Lungkhun, ki thei lud naduh 14 haduh 18 snem bad ki Khyllung kiba hapoh 6 snem, ki khynnah khynnah kiba dei ki nongioh bynta ia ka skhim “Special Nutrition Programme” – ka skhim ai bam bynrap (Supplemtary Nutrition).
“Kane ka skhim ka long ka jingkyrkhu ia ki nongioh bynta ha kaba ki la ioh ia ki jingbam kiba tei ia ki met ki phad jong ki, hynrei, kin hap ban duh noh ia kita ki jingmyntoi lada kim don ia ka Aadhaar Card” kala ong haba bynrap “Shen yn sa pynsangeh noh ruh ia ka pisa jong ki Job Card Holder lada kim don ia ka Aadhar Card”.
Kat kum ka jingong ka DC, ka jingdon jong ka Aadhaar Card ka long kaba donkam ruh na ka bynta ka seeding kaba dei ka skhim MGNREGA (skhim shispah sngi), MHIS (skhim iarap siew bai dawai bad bai sumar), NFSA (khaw rashon) bad kumjuh ki kam kiba iadei bad ki Bank, Scholarship (bai bam khynnah pule), NSAP (bai bam tymmen), LPG connection (ban ioh gas ha ing) mobile connection (ban ioh sim card) kumta ter ter.
Namar kane, ka Deputy Commissioner kala kyntu ia baroh ki nongshongshnong ka District ba kin sngewbha ban leit pynrung kyrteng Aadhaar noh ialade da kaba leit sha ki jaka bala pynbeit da ka Ophis jong ki Block Development Officer (BDO).
La kyntu ban rah lang ia ki kot kiba donkam kum ki Birth Certificate, ka EPIC ban ioh pynrung kyrteng Aadhaar. Lah ong ruh ba lada ki khun kim pat don ia ka Birth Certificate, kin sngewbha ban kit khia ban ioh ia ki Court Order kham kloi khnang ba ki CHC/PHC kin ioh ban pynkhreh ia ki Birth Certificate.
La kyrpad ia baroh nongshong shnong ka Distrik ba kin shim khia khnang ba ki ym duh jingmyntoi ia ki skhim Sorkar.
