Shillong, Jymmang 30: Ka Rangdajied United kala ioh rung sha ka Semifinals jongka Meghalaya State League 2023 hadien ba kala pynrem iaka Mulait United da 5-0 ha ka Group B kaba la long ha Kiang Nangbah Stadium,Jowai hynne ka sngi Baar.
Kane ka jingjop jong ka Rangdajied kala pynlong ia ka ban kamai 13 point bad kane kala pynthikna ia ki ban long ka lahduh ha ka Group B watla ka dang don sa kawei ka jingiakhun ha kti.
U Wansiewdor Nengnong ula thep ia ka kol ha ka minit kaba 21 bad 90+3, katba u Basuklang Bina ula ioh thep iaka kol haka minit kaba 45+2, u Knerktilang Buam ula thep iaka kol haka minit kaba 58 bad 63.
U Romarius Laban jongka Mulait ula shut ia ka Freekick hynrei u nongap kol ka Rangdajied u Banshanlang Sten ula rynsied jngai ban ioh ban iada ia katei ka bol ban rung shapoh kol.
Ha ka kylla miet, ka Mulait kala ialehkai bha hynrei kam shym la lah ban thaw pyrthei eiei ruh em.
Ha kane ka jingiakhun u Lessius Sujai ula ioh iaka ‘Red Card’ hadien b aula ioh ar tylli ki ‘Yellow Card’ da kaba woh ia u Nengnong uba dang rah iaka bol ban rung shapoh ka Box jong u nongapkol.
Ka jingiakhun ha ka sngi Balang ha ka Group B ha Jowai hapdeng ka Sein Pynbhalang pyrshah ia ka Youth Club Pdengkarong ha ka por 2:30 mynsngi katba ha ka Group C ha Mawkyrwat ka jingiakhun kan long hapdeng ka Mawten pyrshah iaka Shillong Lajong haka por 3 baje mynsngi.
