Shillong, Jymmang 30 : U Myntri ka Tnad Food, Civil Supplies and Consumer Affairs Bah Comingone Ymbon hynne ka sngi Ba-ar, ula kyntu ia ki Ophisar ban shimkhia halor ka jingpyndonkam ia ki electronic Point-of-Sale (e-POS) machine da ki Fair Price Shop khnang ba baroh ki nongioh marbam kin ioh iala ka bhah kumba dei hok ban ioh nalor ban pynthikna ruh ia ka jingpynrung kyrteng Aadhaar ba 100% khnang ba kan nym don ka jingkhate ia ka bhah.
U Myntri ula ai ruh ka jingiaroh ia ka Tnad halor ka jingpyntreikam ia ka Online Tracking ba iadei bad ka jingiaid ki marbam (na kudam sha ki FPS) na East Khasi Hills namar kane kan iarap ban tehlakam ia ka jingphah ia ki marbam sha kiwei pat ki jaka.
U Bah Coming ula pynlong ia ka jingialang bishar kam ban peit ia ka jingtreikam jong ki kam bapher bapher bala pyntrei da ka Tnad kum ka One Nation One Ration Card (ONORC), Aadhaar Seeding, electronic Point-of-Sale (e-POS), ka jinglum thup ia baroh ki FPS GPS Coordinates bad ka jingpeit bniah iaka jingiaid ki kali kiba kit ia u khaw rashon ha kylleng ki bynta jong ka jylla Meghalaya bad kiwei kiwei.
Ka One Nation One Ration Card ka dei kaba la pyntreikam ha ka jylla kum shi bynta ban plie lad ia ki paidbah ba kin kit ia u khaw rashon na kino kino ki dukan rashon kiba don ha ka jylla bad haka ri hi baroh kawei kata tang lada u Aadhaar nombar jongki u dei uba la pyniasoh lang bad ka database jongka PDS.
Ban pynthikna ba kan don ka khuid ka suba bad ka jingkhein jingdiah kaba paka, kumta la buh iaki electronic Point-of-Sale ha man la ki dukam sam rashon kiba don haka jylla.
Ha kane ka jingialang la iashimbynta ruh da u Commissioner & Secretary ka Consumer Affairs, ki Ophisar ka Tnad lem bad ki Deputy Commissioner bad ki Sub Divisional Officer (SDO).
