Imphal, Jymmang 30 : U Myntri kam Pohiing ka Ri Amit Shah ula poi hynnin ka miet sngi Nyngkong ha Manipur ban pynlong ia ka jingialang bad ki kynhun bapher bapher na ka bynta ban thaw ia ki buit bad ki lad ki lynti ha kaban tem ia ka thma pher jaidbynriew kaba jia naduh ka 3 tarik Jymmang ha Manipur.
Mar synpoi ha Manipur, u Amit Shah ula lum ia ka jingialang bad ka Kynhun ki Myntri bala ialam da u Myntri Rangbah ka Jylla N Biren Sing bad kane ka jingialang kala iatai halor ka jinglong jingman ka suk ka sain hapoh ka Jylla.
Ka khubor ka iathuh ba u Amit Shah u lah ruh ban leit iuhkjat ha ki District ba iakhleh jaidbynriew kynthup kito kiba don ha khappud ka India-Myanmar.
Hynnin ka step sngi Nyngkong, u Myntri Rangbah ula shong bishar kam halor ka jingpynkhreh ia ki bor pahara ha ryngkat bad u Myntri Khynnah ki kam Pohiing u Nityanand Rai lem bad kiwei kiwei ki Heh Sorkar.
Ka korphiw, kaba la pynjari hadien ka jingmih ka thma pher jaidbynriew ha ki 11 tylli ki District, ka dang iai bteng ban treikam kynthup ha Imphal East bad Imphal West.
Ki shipai kynthup ki Central Paramilitary Force, Manipur Police Commando bad ka Rapid Action Force, ki dang pynjur ia ka jingkhynra kaikhlaw ha Imphal Valley bad kiwei kiwei ki District ka Jylla.
