Shillong, Jymmang 30 : Ka State Education Mission Authority of Meghalaya (SEMAM), Samagra Shiksha, ka Tnad Pule Puthi ka Jylla, kala iasoi soskular Memorandum of Understanding (MoU) bad ka National Institute of Open Schooling (NIOS) ban wad bad pynrung skul biang ia ki Khynnah ba pep skul shiteng por hapoh ka Jylla.
Ka SEMAM bad ka NIOS kila iasoi ia kane ka MoU ha ka 27 tarik Jymmang ha State Convention Centre, Shillong.
Kiba la iadonlang ha kane ka sngi iasoi soskular ki kynthup ia u Director of School Education & Literacy (DSEL) bad State Project Director SEMAM, Samagra Shiksha u Swapnil Tembe lem bad u Chairperson ka NIOS Prof Saroj Sarma.
Lah ban kdew ba ia mynta, ka Meghalaya ka don haduh 25 tylli ki NIOS Study Centre ha ki 5 tylli ki District ka Jylla- ka East Khasi Hills, West Jaintia Hills, Ri-Bhoi, East Garo Hills bad West Garo Hills districts.
Ka SEMAM kala kyrpad ruh ia ka NIOS ban nang pynbun ia ka jingdon ki NIOS Study Centre ha ka Jylla khnang ba kin don lang ha kiwei pat ki District ki bym pat don Centre.
Ka State Project Office kala shimkhia ruh ban pynsaphriang ia ki khubor lyngba ki kot khubor, FM Radio bad pynlong ia ki road show campaign bad ka 93.5 red FM halor ka jingpynrung skul biang ia ki khynnah bala pep skul shiteng por, ban iarap ban kyrshan ia kine ki Khynnah kiba don hapdeng ka rta ba 16-19 snem tad haduh ka klas XII ba kin leit pule biang ha ki NIOS ha East Jaintia Hills bad Ri-Bhoi District.
La ong ba ia kum kine ki juh ki prokram yn sa pynlong ruh ha kiwei kiwei ki District ba dang sah ban pynsaphriang ia ka jingtip shaphang ka NIOS naba bun ki Khynnah ba pep skul shiteng por kim don jingtip satia ia kane ka lad ban ioh leit pule.
