Imphal, Jymmang 29 : Ki shipai kila nang pynjur mynta ia ka jingkhynra kaikhlaw ha jylla Manipur hadien ka jingioh khubor ia ka jingshah ther kuli ki riew paidbah, ka jingiapynibor hapdeng ki karkhlaw ba ki bor pahara bad ka jingnang saphriang ki jingiakynad pher jaidbynriew ha Imphal.
Ka khubor Sorkar ka pyntip ba haduh 5 ngut ki briew kynthup uwei u Pulit, kila duh noh iala ka jingim katba 12 ngut kila mynsaw jur na ka jingmih biang ka jingkulmar ha kine ki khyndiat sngi bala leit.
Wat hapdeng ka jingpynjari ia ka korphiw, ki briew kila ia mih sha surok bad pynkhein ia ki kyndon ain hynnin ka miet Sngi U Blei, kaba lam sha ka jingiapynbi bor bad ki bor pahara. Namar kane, ki bor pahara kila hap ban siat tyndong lyer pynsat khmat bad siat kuli sha suin ban tehlakam ia u paidbah.
Kat kum ka jingpyntip u Myntri Rangbah ka Manipur N Biren Singh, ki shipai kila ioh ban siar iap haduh 40 ngut ki kaikhlaw kiba la kieng da ki suloi khlein bor ha kine ki saw sngi bala leit noh.
Namar kane ka jingiai neh ka jingkulmar, u Myntri kam Pohiing ka Ri Amut Shah ula pynbna ban sa leit iuhkjat ha Manipur, kaban long naduh ka sngi nyngkong haduh ka 1 tarik Jylliew. Ka jingleit jong u ka long ban pynlong ia ki jingiakren hapdeng ka Sorkar Pdeng bad ki kynhun bapher bapher na ka bynta ban wanrah pat ia ka jingsuk ha ka thain.
Kane ka jingkulmar bad jingiakynad pher jaidbynriew ha Manipur kala sdang naduh ka 3 tarik Jymmang. Ka jingkulmar kala khie na ka jingiaid rally ha ki 10 tylli ki District ka Jylla ba pyrshah jur ia ka jingdawa ka Jaidbynriew Meitei ban ai jingithuh noh ia ki kum ki Scheduled Tribe ka Jylla.
Ha kane ka jingiakynad jaidbynriew, haduh 80 ngut ki briew kila iap. Kane ka Jylla mynta ka dang don hapoh ka jingpynjari ia ka hukum ba khang treikam ka kor internet kaba la iaid mynta la 25 sngi.
