Guwahati, Jymmang 25: Kawei ka Longkmie kala iap bad bun ngut kila mynsaw jur na ka jingbthei kynsan jong u pipe um ha ka thain Kharguli, Guwahati hynne ka janmiet sngi Palei por 3 baje eiei.
Kane ka Longkmie kaba iap la tip kyrteng da ka Sumitra Rabha.
Kat kum ka khubor, namar ka jingbthei jong u pipe, ka um kala kynshait laki laka bad rong ia bun tylli ki kali bad pynjulor ruh ia palat 40 tylli ki Iing.
Haduh 600 ngut ki briew kila shah ktah bad kumba 30 ngut ki briew kila mynsaw ha kane ka jingjia.
Ha kajuh ka por, ia kine kiba mynsaw la pynkit noh sha ki hospital ba marjan ba kin ioh jingsumar. Ki pulit kila kerkut ia kane ka jaka bad ka jingtohkit mynta kala iaid shakhmat ban lap ia ki daw ka jingbthei une u pipe um.
Kat kum ka jingiathuh ki trai shnong, ka jingbthei kala mih ha ka por ba plie ia ki valve ban test ia ka jingiaid ka um lyngba ki pipe ba thymmai.
Ka Guwahati Metropolitan Development Authority (GMDA) kala kular ban maramot kloi noh ia ka kam khnang ba ki paidbah kin ioh ia ka umbam umdih.
Ki briew kiba shah ktah kila dawa ia ka bai lutksan naka GMDA halor ka jingjulor ki nongkynti jong ki.
