Shillong, Jymmang 26: U President ka Khasi Students Union (KSU) Bah Lambokstar Marngar ula ai jingmut ia ka Sorkar Meghalaya ban thaw da ka Committee ka ban iatai halor ka kam jong ka Reservation Policy khnang ba kan ai jingmyntoi ia baroh ki briew jong ka jaidbynriew hapoh Meghalaya.
Hynrei, une u Nongialam ka KSU ula ong ruh ba kan dei ka jingtynjuh kaba khraw bha ha kaban pynkylla syndet syndet ia ka policy namar ka dei ka kam kaba la iaid la palat 50 snem mynta.
Haba iakren bad ki nongthoh khubor, u Bah Lambok ula ong b aka Policy kam dei satia ka ishu thymmai ia ka KSU, ki Nongialam ka KSU kila pynpaw ia ka jingsngewkhia la bun tylli ki snem ba kala donkam ban bishar thymmai noh ia ka Policy.
Ka KSU sa shisien ka ban ba ka Roster System ka dei ia kaban pyntreikam nangne shakhmat ym ban phai kyrtiang shadien.
“Ban shu pynkynkylla syndet ka dei kaba eh, hynrei lada ka (Sorkar) thaw da ka committee ban bishar ia ka Roster, nga ai jingmut ia ka Sorkar ban thaw sa kawei ka Committtee ka ban iatai halor ka kam jong ka Reservation Policy namar kane kan sa ktah ia ki briew jong ngi haba phai sha ka iohkam iohjam” ong u Bah Lambok.
Haba peit ia ka jingiadon bun paid, baroh ki tip ba kano ka Jaidbynriew ka don bunpaid eh, hynrei lada ka Sorkar ka don hangne ban shakri na ka bynta ka jingmyntoi jong baroh, ka dei ban thaw noh da ka Committee, ong u Bah Lambok.
“Ka long kaba ma ban shu ia kynthih sha kaba kut, hynrei kaei kaba bha ia baroh ka long ba ka Sorkar kan thaw da ka Committee ha ryngkat ki stad ki jhad na ka jaidbynriew Khasi bad Garo khnang ba kan nym don ka jingleh shiliang iano iano ruh” ula bynrap.
U Bah Lambok ula bynrap ba da ka jingkylla ka por, ka long kaba donkam ban shong bishar thymmai noh ia ka Reservation Policy haba phai sha ka iohjam iohjam.
