Shillong, Jymmang 25 : Ka Tnad Animal Husbandry and Veterinary kala pynshai ba kam shym la don satia ka jing iap jong uwei u briew na ka jinglynshop jong ka khlam sniang (African swine flu) ha Tiehsaw, West Khasi Hills, kumba la pynmih ha kawei na ki kot khubor phareng ka Jylla.
U Secretary ka Tnad Animal Husbandry & Veterinary Dr Manjunatha C, ula pynpaw ba ka jingpynmih ia kane ka khubor ka dei kaba thok haba ong ba une u briew bala thoh khubor, u dang im bad ym shym don satia kiba iap na kane ka jingpang sniang.
Hynrei ula pynthikna ba kala don ka jingiap haduh 22 tylli ki sniang namar ka khlam sniang, kiba dei jong uwei u briew na Tiehsaw.
U pyntip ba ka Tnad kala ithuh ia ka Tiehsaw kum ka thymmei jong ka jingpang bad kala shim ia ki lad pyrrkhing kiba tyngeh bad khangkut ia ka shnong ban iada ia ka jingsaphriang jong kane ka khlam.
Ha kajuh ka por, u Dr Manjunatha ula pynshai ba ka African Swine Flu kam dei ka jingpang kaba lah ban iabit na ki sniang sha u briew bad kane ka jingpang kam don jingma satia ia ka koit ka khiah ki briew.
