Shillong, Jymmang 24: U President ka Voice of the People (VPP) bad MLA ka Nongkrem Bah Ardent M Basaiawmoit, hynne ka sngi Balang, ula ther ia ki Seng riewlum ka Jylla namar ka jingsngap jar halor ki ishu, kaba kila kular ha ka por ialap elekshon.
U Bah Ardent ula kynthoh ia kane haba jubab ia ka jingkylli halor ka jingkynnoh sngap jar jar ka United Democratic Party (UDP) ia ka jingdawa ban shong bishar thymmai ia ka Job Reservation Policy, watla ka dei kawei na ki jingkular ba hakhmat eh ha ka mat ialap elekshon.
“Nga sngewsih ban ong ba baroh ki seng riewlumha Jylla ki dei ki seng ki bym ieng satia na ka bynta u paidbah. Ki dei ki seng kiba shu iakhun tang ia ka elekshon. Ha ki, ka dei tang ban iakhun elekshon, ban jop elekshon bad hadien ka elekshon baroh kine ki mat kila shu kut noh, kin ym iakren eiei hi ruh” ong u Bah Ardent haba iakren bad ki nongthoh khubor.
Kat kum ka jingong jong u, ka jingleh jong ki seng riewlum kam dei shuh ka kam ba dang shu jia hakhmat u paidbah ka Jylla.
Une u MLA ka Nongkrem ula jam sha ka sngi ba-ar jong ka jingshah jingit ba khlem pud hynne ka sngi Balang ban pynbor ia ka Sorkar ba kan shong bishar thymmai noh ia ka Job Reseravtion Policy 1972.
U Bah Ardent ula pynpaw ba ula kut jingmut ban shong shah jingit tad haduh ba ka Sorkar Jylla kala mynjur ban pynurlong ia ka jingdawa. Hynrei kat haduh kane ka khep, kam pat shym la don satia kano kano ka jingpyni dak na ka Sorkar.
“Hynrei, ngan ym kynriah satia nangne tad haduh ba ka Sorkar Jylla ka mynjur ban shong bishar biang ia ka Job Reservation Policy” ula bynrap.
Une u Nongialam ka VPP ula pynpaw ruh ba ka party kan pdiang ia ka jingkhot jong ka Sorkar Jylla lad aka jingkhot ka long na ka bynta ban iakren halor ka jingbishar thymmai ia ka policy.
