Shillong, Jymmang 24: U Myntri Rangbah ka Jylla Conrad K Sangma hynne ka sngi Balang ula ong “Haba don hi ka mon, ka don beit ka lynti” haba kren halor ka jingpynbeit noh ia ki jingiakajia pud ha ki hynriew tylli ki jaka ba jur eh ka jingiakajia hapdeng ka Assam bad Meghalaya ba khlem pat ktah ha ka wat iapynbeit pud ba nyngkong.
Ka Assam bad ka Meghalaya kila sdang ia ka jingiakren pynbeit pud hynne ka sngi Balang. U Myntri Rangbah ka Jylla Conrad K Sangma bad u Myntri Rangbah ka Assam Himanta Biswa Sarma kila iakynduh ha State Guest House ha Guwaati ban iakren halor kane ka kam bad ban buh por ha kaban pyndep ia ka kam.
Kine ki hynriew tylli ki jaka ba don hapdeng ka jingiakajia pud kaba jur eh ka dei ka Langpih, ka Borduar, Nongwan-Mawtamur, Desh Doomreah, Block-I bad Block-II lem bad ka Psiar-Khangduli.
Watla u Myntri Rangbah ka Assam ula pynpaw ba ka long kaba eh ban buh por namar ka jingbuh ki jyrwit jyrwat ban lah pynbeit ia kine ki 6 tylli ki jaka, u Myntri Rangbah ka Meghalaya ula ong “Ngi ngeit ba haba don ka mon, ka don beit ka lynti bad ngin sa shem ia ka lynti ban jam shakhmat da ka jingiashaniah bad jingiadei paralok ba ngi don. Kin iai bteng ban btin lynti ia ngi ha ka ban pynthikna ba ngin lah pynbeit noh ia kine ki 6 tylli ki jaka ba jur eh ka jingiakajia”.
Dang ha ki bnai bala lah, ka jingkulmar bad jingiakynad kala mih ha ki katto katne ki jaka ba hap ha kine ki 6 tylli ki jaka ba iakajia. Ha ka 11 tarik Jymmang, kala mih ka jingiapynibor hapdeng ki Khasi-Pnar bad ki Karbi ha Khanduli, West Jaintia Hills. Ha ka 22 tarik Naiwieng, 2022, 4 ngut ki briew kila iap bad 4 ngut kila mynsaw na ka jingther kuli ki Pulit ka Assam ha Mukroh. Ha Langpih, naduh u snem 2000 ter ter, kila mih shibun ki jingkulmar hapdeng ki Khasi bad ki Nepali.
Hynrei, ki Myntri Rangbah jong baroh artylli ki Jylla kila kut jingmut ban pynbeit noh ia ka jingiakajia pud da ka “Mynsiem ka Jingiashaniah mar kylliang” bad ka “Jingiaieid paralok”.
Haba kylli halor ki jyrwit jyrwat jong kine ki 6 jaka, u Myntri Rangbah ka Assam ula ong ba ki don katto katne ki jaka ha kaba ka Sorkar Assam kam shym la pyniaid ne khmih ia ki jaka hynrei ka jingkhmih ka dei bad ka Karbi Anglong Autonomous Council (KAAC).
“Namar kata, kine ki jaka kin kham jynjar hynrei u Myntri Rangbah ka Meghalaya ula ong, haba don ka mon, kan sa don beit ka lynti..Namar kata, ngi la rai ban jam shakhmat, ban iaid da ka mynsiem ka jingia ieid paralok bad ngi ngeit ba ka lynti kan sa mih” ula ong.
Ki Regional Committee na baroh ar ylla kin sdang shong jingialang noh, iatai bad pynlong ia ka jingwad jingtip na kine ki jaka ba iakajia bad hapoh u bnai Naitung, kin sa aiti ia ka kaiphod ha kaba yn sa pynbud biang da ka jingialang hapdeng ki Myntri Rangbah.
