Tura, Jymmang 24 : Ka Meghalaya Lok Ayukta kala pynngat ha ki kyndon ain (chargesheet) ia u Chief Executive Member (CEM) barim ka GHADC Boston R Marak, u MDC ka Asananang Ismail Marak bad 11 ngut ki MDC barim bad ki Nongtrei, ki Contractor ka Council namar ki kam bamsap.
U Ismail Marak u dei ruh u MLA barim ka Rongram hashuwa ban phiah ia ka constituency.
Ha ka hukum ba pynmih ha ka 18 tarik Jymmang, 2023, u Chairperson ka Meghalaya Lok Ayukta Bah B Dhar, ula hukum ia u Director of Prosecution ban aiti ia ka case record sha u Public Prosecutor ka West Garo Hills, Tura ban tian bishar ha ka Iingkashari ba kyrpang ha West Garo Hills, Tura pyrshah ia ki 13 ngut kiba la shah pynngat ha ki kyndon ain 7 bad 12 jong ka Prevention of Corruption Act, 1988.
Kane ka kam bamsap ka iadei bad ka ujor bala mudui da u Nilberth ChM arak na Dawa Gittingre, East Garo Hills District ha ka IIngkashari ka Lok Ayukta myn ha ka 2 tarik Jymmang 2019, kaba long pyrshah ia u Ismail Marak, MDC barim ka Asanang namar ka jingpyndonkam bakla ia ka song pisa ba kot T. 1 klur bala mang sha ki project bapher bapher ha Asanang Constituency.
Kat kum ka jingpyntip u nongmudui, ki don haduh 49 tylli ki project bala ai sha ka Asanang Constituency hynrei ia kine ki project la shu pyntrei thohmut thohmat, kaba pynsuba ia ka jingbamsap kaba shyrkhei.
Hadien ka jingdang ka jingtohkit, ka Lok Ayukta kala ishankhmat pyrshah ia u Ismail Marak bad bun kiwei kiwei. Dei ha ka 24 tarik Naitung, 2019, ka Lokayukta kala hukum ia ka jingtohkit jong ka Central Bureau of Investigation (CBI) halor kane ka kam. Hynrei ia kane ka hukum la tynjuh born oh hapoh ka Iingkashari Meghalaya High Court lyngba ka writ petition (No. 293 of 2019).
Hadien ka jingiakhun mukotduma bala neh slem, ka Iingkashari Division Bench kala pynwai noh ia ka mukotduma ha ka 6 tarik Iaiong 2021, da kaba phai biang sha ka Iingkashari jong ka Lok Ayukta.
Ha ka 18 tarik Rymphang 2022, ka Meghalaya Lok Ayukta kala bthah ia u Director General of Police (DGP) ka Jylla ban tohkit halor ka case kat kum ka kyndon 20 (5) jong ka Meghalaya Lok Ayukta Act, 2014 bad ban phah ia ka kaiphod ha ryngkat bad ka jingpynngat kyndon ain (charge sheet).
U Investigation Officer ula iatyngkhuh ia shibun ki jingeh bad ki jingjia bym lah kiar, kaba la lam sha ka jingslem ka kam. Hynrei watla katta, hadien shisnem, ka jingtohkit kala kut bad ha ka 18 tarik Jymmang, 2023, ia ka kaiphod jingtohkit ba bniah bha sha aiti sha ka Iingkashari ka Lok Ayukta.
Halor ki jingshem na ka jingtohkit, ka Lok Ayukta kala hukum ia u Director of Prosecution ban aiti ia ka case sha u Public Prosecutor ka West Garo Hills, Tura ban tian bishar ia kine ki MDC ba Nongtrei ka GHADC hapoh ka Iingkashari ba kyrpang ka West Garo Hills.
Ki briew kiba la shah charge-sheet ki dei :
1. Boston R. Marak, CEM barim, GHADC
2. Mark Goera B Marak, EM barim ka GHADC na Batabari constituency
3. Winnison Ch. Marak, Dy CEM barim ka GHADC na Rongrikimgre constituency
4. Jimbirth R Marak, EM barim ka GHADC na Amongpara constituency
5. Levastone T. Sangma, EM barim ka GHADC, Jenjal constituency
6. Righteous N Sangma, EM barim ka GHADC, Babellapara constituency
7. Rupert M. Sangma, EM barim ka GHADC, Tura constituency
8. Kenedick S Marak, EM barim ka GHADC, Siju constituency
9. Dhormonath Ch. Sangma, EM barim ka GHADC, Naguapara constituency
10. Ismail Marak, EM barim ka GHADC, Asanang constituency
11. Kubon Sangma, Contractor
12. Nikseng Sangma, Contractor
13. Hewingson A Sangma, Secretary, GHADC
