Shillong, Jymmang 24: Ka Federation of Khasi Jaintia and Garo People (FKJGP) ha ka sngi baar kala kyrpad ia u Myntri Rangbah ka jylla u Conrad Sangma ban shimkhia lem ha kaban iakren bad ka Sorkar Pdeng ban pynkylla ia ka draft model notification jongka Department of Post kaba bthah ba dei ban nang kren bad thoh ia ka ktien Hindi bad English ia kiba trei ha ka Gramin Dak Sevaks ha ka jylla.
Ha ka shithi kaba la phah sha u Conrad Sangma, u President ka FKJGP u bah Dundee C khongsit, u la ong, “na ka bynta ka bha ka miat jong ki samla ka jylla kiba la nang la stad, nga kyrpad ia phi ban tuklar lem ha kaban shimkhia bad ka Ministry of Communication, jongka sorkar pdeng ban pynkylla iaka draft model notification jongka Department of Posts kaba bthah ba dei ban nang bad tip ia kawei na ki ktien tynrai jong ki 3 tylli ki riewlum jongka Meghalaya bad dei ruh ban nang bad tip ia ka Hindi bad English ban pyndonkam kum ki Gramin Dak Sevaks ha ka jylla kumba la leh ha kiwei pat ki jylla jongka thain shatei lammihngi ha ka jylla Assam, Manipur bad Mizoram.
“Namar ba ka rukom thungkam na ka bynta kitei ki kam ka lah ban sdang noh kumta ngi kyrpad ba phin tuklar noh mardor khnang ba ki samla trai ri kin ym duh iaka hok ban iohkam iohjam ha ka Department of Posts kumba la jia ha ki snem kiba la leit.” la ong u President ka FKJGP.
Ka Ministry of Communication, Department of Posts, sorkar pdeng kala rai ban thungkam ha ki 445 tylli ki post Gramin Dak Sevaks, Branch Post Masters bad Assistant Branch Post Masters ha kylleng ki jaka jongka jylla Meghalaya ha kaba kane ka jingthungkam ka lah ban sdang noh shen.
“Namar ba katei ka draft model notification jongka Department of Posts kala kdew ba ka ktien Hindi ne English kum ka kyntien trai ha kabn pyndonkam da ki Gramin Dak Sevaks, ngi sngew ba kane ka kyndon kan pynduhlad ia ki samla ban ioh ia katei ka kam namar ba kin hap ban iakhun bad kiwei pat ki samla kiba na kiwei pat ki jylla kiba lah ban leh bha ha ka sobjek Hindi,” ong u Bah Khongsit.
“Kaei kaba donkam ban kdew hangne ia kaei kaba la jia ha ki snem.kiba la dep, na ki samla kiba la shah jied ban ioh ia ka kam kiba nabar ka jylla tang katto katne ngut kila wan trei ha Meghalaya bad hadien kila pan ban leit trei noh sha ki jylla jongki da kaba aidaw ia ka jingdon ki jaka sha kyndong bad ka jingeh ban iaid ia ki riat bad ki thiep bad ka jingeh ban iakren ha ki thain nongkyndong,” ula ong ryngkat bad ka bynrap ba ka jingthmu ban buh ia ki tnad jongka Post Office ha ki thain nongkyndong ha Meghalaya kala shah pynrem noh bad wat ka lad iohkam iohjam ki samla trai ruh kala shah khang noh.
