Shillong, Jymmang 19: Ka Myntri Sorkar bad MLA ka National People’s Party (NPP) Kong Ampareen Lyngdoh, kala ban jur iaka jingdonkam ban pynthikna ba dei ban don da ka Roster System kaba khlain ban iada iaka bha ka miat jong baroh ki nongshong shnong jong ka jylla.
Ka Kong Ampareen Lyngdoh kala ong ruh, ba ka sorkar kala bud ia ka jingbthah jong ka High Court ha kaba iadei bad ka Roster System jong ka Reservation Policy.
“Ki dkhot jong kawei na ki seng saiñ pyrthei kila jah ban iashimbynta ha ka jingialang watla ka iing ka long kaba plie ban iakren halor kino kino ki jingbynniaw ne jingartatien. Kane kadei kaei kaei kaba hap ban pynbit pynbiang, ngi hap ban buh ia kiei kiei ha ka lynti kaba dei. Lada don kino kino ki jingartatien ne jingkylli kiban buh, ngi la pynbiang ia ka rynsan” ong ka Kong Ampareen.
Lah ban kdew hangne ba ka VPP kala pynsawa jam ia ka sur halor ka jingbym iohlad ban kren ha ki rynsan kiba biang ban iakren halor katei ka mat, hynrei ha ka sngi Thohdieng kila mih jyndat na ka jingialang jong ka All-Party Meeting namar ka jingsngew ba ka dei ka jingialang ka bym don jingmut na ka daw ba ki kwah ban iakren halor ka Reservation Policy ym ha kaba iadei bad ka Roster System.
Kala ong ba ka sorkar MDA-II kala wer ia baroh ki seng sain pyrthei ba kin wanrah ia ki mat ki jongki ha kaba iadei bad ka Roster ban aiti ha ka committee kaba dang shu dep thaw.
“Ngin ym khang noh ia ka jingkhang jong ngi iano iano ruh da ka jingkyrmen ba ngi kum ki briew kiba don ha ka bor, kiba shna iaka aiñ bad ki polisi kiba kongsan jong ka jylla, ngin leh ha ka lynti kaba biang bha” ong ka Kong Ampareen.
