Shillong, Jymmang 19 : U Myntri Rangbah ka Jylla Conrad K Sangma hynne ka sngi Thohdieng, ula pyntip ba baroh ki seng sain pyrthei kynthup kiba don ha ka Liang Pyrshah, kila sngewthuh ia kaei kaba ka Sorkar Jylla ka leh halor ka Roster System bad iaroh ruh ia ki sienjam bala shim hynrei ngam lah pei phang satia ba nangno ki jingpynshong nongrim (logic) ka Voice of the People party (VPP) ki mih mynta.
U Myntri Rangbah ula kynthoh ia kane hadien ka jingphet jyndat jong ki Nongialam ka VPP na ka jingialang All Party Meeting bala pynlong hynne ka sngi, ban iatai iathir halor ka jingpyntreikam ia ka Roster System hapoh ka Jylla.
“Phi lah ban iohi baroh ki seng sain pyrthei kila don hangne bad baroh ki seng sain pyrthei kila sngewthuh ia kaei kaba ka Sorkar ka leh bad iaroh ruh ia ka jingsngewkhia jong ka Sorkar. Hynrei ngam lah sngewthuh ba nangno ki jingpynshong nongrim (logic) ka VPP ki mih mynta” ong u Conrad haba iakren bad ki lad pathai khubor hadien ka jingialang.
“Nyngkong ki ong ba ki kwah ban iakren halor kane ka kam bad mynta kila wanrah pat da kawei ka mat” ula ong haba bynrap “Ka dei ka rai politics jong ki, nga shu kyrpad tang kawei ba ngi dei ban sngewthuh ba ngi dei ki Nongialam ba don ka jingkitkhlieh…phi dei ban sngewthuh ba ngi don ka jingkitkhlieh ia ka Jylla bad ia ki Nongshongshnong jong ka.
Ngi donka ban sngewthuh ba ki don ki kam kiba lah ban buh jingma ia ka jingiashongsuk sjongshngain hapdeng ki jaidbynriew (communal harmony) bad kiba lah ban ktah ia ka jingialang kawei hapoh ka Jylla” ula bynrap.
U Conrad ula ong “Kum ki Nongialam ba don jingkitkhlieh, ngi dei ban tip lano, hangno bad kumno ba ngin jam shakhmat. Kiei kiei baroh kim dei namar ka Politics, kam dei tang ban ioh jingmyntoi ha ka sain hima sima. Hynrei ngi dei ban sngewthuh ba ngi hap ban don jingkitkhlieh kum ki Nongialam ban pynthikna ba ka jingshngain, bad jingshongsuk shongsain jong ka Jylla ka kham kongsan duh”.
“Hooid ki don ki jingtynjuh hangne hangtai, kin don beit ki jingtynjuh hynrei kaei ka lynti bala shim bad ka jingpyrkhat bala shim ka dei kaei kaei kaba baroh ki Seng sain pyrthei bad ki Liang Pyrshah bad baroh kila iaroh watla kila pan ia ki katto katne ki jingpynshai hynrei haba kut hi, kila sngewthuh ba kumno ngin pyniaid shakhmat ia ka kam” ula ong.
U Conrad ula kyntu ia baroh ki seng sain pyrthei bad ia ki Nongkyrshan jong ki seng sain pyrthei bapher bapher ba ki dei ban sngewthuh ba ngi bhabok palat ban ioh iala ka jong ka Jylla mynta la palat 50 snem bad donbok palat ba ka Jylla ka don ia ki policy bapher bapher, ka bhah thungkam kaba la ai jingmyntoi ia ki trai Jylla la bun bun phew snem.
“Ngi hap ban kynmaw ba lada ngi iaid sha kine ki kam, nga tharai kum u nongialam ba don jingkitkhlieh bad baroh ki nongkyrshan jong ki seng sain pyrthei, ngi donkam ban shong bishar bha bad donkam ban shim ia ka rai kaba dei” ula ong.
“Kine kim dei ki kam kiba suk, kine ki dei ki kam ba jyrwit jyrwat bha bad ngi la khmih mynta iaka jinglong jingman kiba lah, phi tip, ban wanrah ia ka jingbym iashongsuk hapoh ka Jylla bad kaba lah ban ktah ruh wat ia ka Reservation Policy jong ka Jylla lada nang iaid palat ia kaei kaba long mynta” ula bynrap.
U Conrad ula ong “Kum ka Sorkar bad Myntri Rangbah, ngan pynthikna ba ngan sngap lut ia baroh.. ki don ki rai ba eh ba hap ban shim bad ngi lah shim ia kine ki rai ba eh mynta.
Ki seng sain pyrthei kiba don mynta kila tip ia ki jingsngew kiba don mynta ynrei ngi hap ban pynbiang tarajur bad pynthikna ba ngin pyntyllun shakhmat ia ka kam ha ka lynti kaba biang eh”.
U Myntri Rangbah ula pynpaw ia ka jingsngewnguh bad jingiaroh ia ki seng sain pyrthei baroh kiba la wan sha ka jingialang.
