Agartala, Naitung 5:Ka jingkhihwin hapoh Kasturba Gandhi Girls’ Hostel ka ba don ha Ambassa ha Dhalai district jong kaTripura namar ka khubor hamsaia ba don ka rngai ka la saphriang sted bha kum ka ding.
Watla katta, kane kam dei satia ka sien ka ba nyngkong ba kum kane ka khubor ka la saphriang. Ha kine ki saw snem ba la dep ruh katto katne ki khynnah ki ba shong hostel ha kane ka jaka la ithuh ba ki la her syrngiew namar ka jingsakhi ia ka rngai.
Namar ka jingtieng ki khynnah pule ki la mih noh na la ki jong ki kamra namar ka jingsyier ban dang sah hapoh kane ka hostel.
Na ka liang u nongkhmih jong ka hostel u la pyntip ba ha ka 27 tarik u Jylliew ba la dep, laingut ki kynthei kynthei la iathuh ba ki la sakhi ia ka dur rngai ka ba riam lieh hadien ba ki la kem pang namar ka jingtieng. Hadien kane ki la mih noh mardor hapoh kane ka hostel.
Kumjuh ha ka sngi ka ba marbud kane ka juh ka jingjia ka la jia sa ia ki arngut kiwei pat. Na ka liang ki bor pyniaid skul ki la khot pynlong ia ka jingialang ka ba kyrkieh bad ki kmie ki kpa jong ki khynnah kumjuh bad ki trai shnong nalor ki heh ka tnat pule puthi.
Watla katta kane ka jinglong jingman ka la lam sha ka ba kham sniew kata hadien ba baroh ki 50 ngut ki khynnah kynthei lem bad ki nongkhmih jong ki ki la dep pyntip lypa sha ki bor pyniaid skul ba ki la mih noh napoh kane ka hostel.
Kane ka hostel ka ba don ha ka thain ba pajih ha Ganganagar ka la paw khubor ha ka snem 2018 hadien ba kawei ka khynnah kynthei ka la sdang ban leh klumar bad maham ia kiwei ki para khynnah ba ki dei ban mih noh napoh ka hostel khnang ban iada ia ka jingim jong ki.
Hadien ba la sakhi ia kane ka jinglong jingman ka ba khyllah, kine ki khynnah ki la mih noh napoh ki kamra jong ki.
Lyngba ka jingshim khia da ki bor pyniaid la shem ba ka la don ka jingshim kabu namar ka jingbym biang pahara ha ka ba katto katne ki runar khaii drok ki la pyrshang ban pynher syrngiew khnang ban pynbor ia ki khynnah ba kin mih noh na ka hostel.
