Shillong, Iaiong 24 : U Chief Executive Member (CEM) ka Jaintia Hills Autonomous District Council (JHADC) ma Thombor Shiwat hynne ka sngi Nyngkong, ula kynnoh ba ka jingkren jong u Deputy Commissioner ka Karbi Anglong ba kam ba ka Khanduli ka hap hapoh u pud u sam ka Assam ka dei kaba pynbitar.
Ha ka taiew bala lah, u Deputy Commissioner ka West Karbi Anglong Krishna Baruah ula kam ba ka Shnong Khanduli ka dei kaba hap sha Assam halor ka nongrim jong ki kot ki sla bala pyni da ka Karbi Anglong Autonomous District Council (KAAC).
Haba iakren bad ki nongthoh khubor hadien ka jingialang bad ka KHADC, u CEM ka JHADC ula ong ba ka Shnong Kharduli haduh mynta ka dang hap hapoh u pud u sam ka Meghalaya bad dei ka JHADC kaba dang ai ia ka syrnot.
Lah ban kdew ba ha ka 15 tarik Iaiong, da ki spah ngut ki nongshongshnong ka Khanduli kila mih ban pyrshah bad kyndang ia ka signboard bala pynieng da ka Tnad Forest ka KAAC ban buh ia ka khyrdop lum khajna hapoh ka Shnong.
