Shillong, Iaiong 21 : U Myntri ka Tnad Ialehkai ka Jylla Bah Shakliar Warjri hynne ka sngi Thohdieng, ula pynpaw ia ka jingangnud ban pynjanai bad pynioh ia ki madan ialehkai kiba paka ia ki samla kiba ieid ia ki jingialehkai hapoh ka Jylla.
Haba pynpaw ba bun ki samla ki dei kiba ieid ia ki kam ialehkai khamtam ka phutbol, u Myntri ula ong ba ka jingthmu ba hakhmat eh ka long ban ai ia ki madan kiba paka bad ruh ban lah pynlong ia ki lympung ialehkai ha Meghalaya khnang ba baroh ki samla kin ioh ban iashimbynta bad ban pyni iala ki jong ki sap ki phong.
Lah ban kdew hangne ba u Bah Shakliar u dei uba dang dei u MLA ba thymmai bad ruh uwei na ki MLA ba khynnah tam ha ka Kynhun Myntri ba mynta.
Ula pyntip ruh ba ka Youth Policy ka dang don hapdeng ka jingbishar bad kam pat dep satia. “Ngi dang shong bishar ia ka bad hadien ba ngi la dep, ngin sa buh ha ka rynsan paidbah” ong u Myntri.
