Shillong, Iaiong 21 : Ka Jylla Meghalaya kala kynjoh ia u mawmer ba jan kot 50% na ki Longiing ha jaka Nongkyndong, kila ioh ia ki kor um hala ki jong ki Iing ki sem.
Haba pyntip ia kane hynne ka sngi Thohdieng, u Myntri ka Tnad Public Health Engineering Marcuise N Marak ula ong “Ka Tnad kala jan tam ia mar shiteng. Ka thong jong ngi ka long ban ai kor um iing sha ki 6.51 lak ki Longiing bad ngi lah lah ban ai 3.10 lak ki longiing, kaba long 47.69%”.
Haba pynpaw ba ka Meghalaya ka dei kaba lah pyntreikam bha napdeng ki Jylla ka Ri ia ka Jal Jeevan Mission (JJM), u Marcuise ula ong ba ka Jylla kala ioh ia ka song T.400 klur kum ka jingai sngewbha da ka Sorkar Pdeng haduh laisien namar ka jinglah pyntreikam bha ia ka JJM ha ka Jylla.
“Ngi la ioh ruh ia ka song pisa ba ai tam jong une u snem. Ngi lah ioh T. 3000 klur tam ban pyntrei ia ka JJM…Namar kata, ha une u snem mang tyngka ba mynta, ngi hap ban treikam bha ban lah ai kor um iing sha ki Longiing” ula bynrap.
U Myntri ula ong ba ki don ki diengpyngkiang kiba ka Tnad kala iakynduh haba pyntreikam ia ka JMM namar ka jinglong ki jaka bad ka jingbym biang ki surok ba pyniasoh sha ki shnong ki thaw.
“Ki don ki jaka ba ki tyllong um kim don bad ka Tnad ka hap ban shu ksam bad ha ki katto katne ki jaka ngi khlem ioh ia ka jingiatreilang na ki Shnong namar ka kam jaka” ula ong.
Ha kajuh ka por, u Myntri ula pyntip ba ka Tnad kan sa thied hi noh tang ia ki GI pipe bad ki HDPE pipe khnang ban lah pynthikna ia ka jingbha jong ki pipe um ha baroh kawei ka Jylla.
“Namar kata, ka Sorkar Meghalaya kala rai ban thied hi noh ia ki pipe bad yn sa ai sha ki contractor khnang ba kim donkam shuh ban leit hi sha ki kompani ban thied dalade ia ki pipe” ula bynrap.
