Shillong, Iaiong 20 : Ka Harijan Panchayat Committee (HPC) hynne ka sngi Palei kala ai jubab ia ka Sorkar Jylla ba ka kyntait ban pdiang ia ka blur print jong ka Sorkar ban pynkynriah ia ka Them Metor na Them Iew Mawlong haba ong ba kane ka jingtyrwa ka Sorkar ka dei ka “Bym pat biang pura, ka bym iahap, kaba khlem pynkhreh bha, kaba leh shiliang bad kaba bei riti”.
Ha ka jubab ba hynriew sla bala phla sha u Deputy Secretary ka Sorkar Jylla bad sha kiwei ki Tnad ka dei khmih, ka shithi jong ka HPC kala ong “Ki don ki jingbymbiang kiba khraw bha, ka jingbym iahap ha ka jingtyrwa jong ka High Leval Committee ka Sorkar Meghalaya”.
“Ngi da sngew rem jur ba naduh ba thaw ia ka Sorkar thymmai, ki Myntri Sorkar, ki MLA bad katto katne ki kynhun kila kila kynthoh ia kaei ka bym sngew iahap da kaba ong ba ia kane ka kam yn pynbeit noh hapoh une u bnai Iaiong. Ki don buit magic aiu ba kin lah ban pynbeit ia kane ka kam tang ha kine ki khyndiat sngi? Kane ka dei ka long sub judice bad kila shu kren lai synhaw bad ngin nym pyndem satia ha kine ki buit politics jong ki”.
“Ngi la iashimbynta ha ka jingialang ka Sorkar naduh ka mynsiem hynrei ka Sorkar kala iaid ban pynsngewthuh bakla lyngba ki lad pathai khubor bad ha ka jingialang, kila pyrshang ban pynbor ia ngi kat kum ki jingtyrwa jong ki. Kila buh ia ka jingim bad ka nongkynti jong ngi ha ka jingma bad thmu pynlong langknia ia ngi” ong u Gurjit Singh, Secretary ka HPC.
Ka HPC kala kynnoh ba kane ka sienjam bala shim daka Sorkar ka dei kaba don jingthmu sniew ha lyndet, kaba pynbor ia ki Nongshongshnong ka Them Metor ban klet iala ka hok, ka nongkynti bad ka bha ka miat bad ban pdiang ia ka jingai jaka sah kum ka phatok jong ka Sorkar kumba la tyrwa ha ka blue print”.
Haba iakren bad ki nongthoh khubor, u Gurjit Singh ula ong “Ka jingdawa jong ngi halor ki phra tylli ki mat ka dang ieng bad ngi nym pyndem ha kino kino ki jingpynbor politics namar ka long kaba suk ia ka sorkar ban leh ia kata bad namar ka jingiaid jong ka por, kane ka jaka jong ngi kala long kum ka par ksiar”.
Kane ka shithi kala kdew ruh ia ki jingduna ha ka blue print jong ka Sorkar halor ka jingrit ki jaka bad ki iing kumba long ki jaka sah ki paro, kaba pynkhein ia ki kyndon tei iing, ka bym don ia ka roadmap ban pynpra ia ki jingtei kiba don mynta, ki bym don ia ka jingdonkam ba man ka sngi bad kaba khatduh eh ka bym kren shai ia ka hok halor ka jaka bad ki iing.
Ka HPC kala dawa ba ka Sorkar ka dei ban pynshai ia kine kiei kiei bad dei tad hadien kane ba HPC ka lah ban shong bishar bad shim ia ka rai.
