Guwahati, Iaiong 19: Ka President jong ka All India Youth Congress’s (IYC) Assam unit, ka Angkita Dutta ka la kynnoh ia u para nongtrei uba dei u heh ka IYC u Srinivas Bhadravathi Venkata halor ki kam banbor bad kren bein pyrshah ia ka tan g namar ba ka dei ka kynthei.
Haba kren sha ki lad pathai khubor, ka Angkita Dutta ka la ong, “Kane ka kam banbor kala iai bteng, kata dang ha une u taiew ba la dep kumjuh.Nga la ujor hapoh ka kynhun mynta la bun bun bnai hynrei ym shym la don ba pynsngap.Mynta Nga la jan duh noh iala ka jong ka burom namar Nga la don ka jingnang jingtip bad trei na ka bynta ki mat kibas iadei bad ki kynthei.U incharge ka IYC u la wan sha Assam bad khot ia nga ‘hei kynthei’ ym kum ka Dr Dutta lane ka Angkita Dutta.Hadien kane Nga la ujor sha ki nongialam ba halor halor kane ka jingjia.Hadien ha ka jingialang ha Raipur ha Chhattisgarh, Nga la rung hapoh ka hotel abd u heh ka IYC u Srinivas ula mih noh shabar.Ngi la ieng ban iakren, hynrei u Srinivas u la ong ia nga, phi kwah ban dih da kaei, ka vodka ne tequila.’ Kane ka dei kaei kaba une u president ka Youth Congress u la pynpaw ha nga, kata sha ka president youth congress kynthei kaba tang marwei.”
“Nga la ujor sha ki nongialam hynrei ym shym la don kiban leh ei ei pyrshah ia u. Nga la shah leh ibein bad shah kgtah ha ka bor pyrkhat pyrdain lyngba kine ki jingleh jong u Srinivas,” ong ka Dutta.
Ha kiba bun tylli ki jingpynpaw lyngba ka twitter, ka Dutta ka la kynnoh ia ka nongialam ka seng Congress ka Sonia Gandhi kumjuh ia u para jong ka u Rahul Gandhi halor ka jingpulom ban pynshitom pyrshah ia u Srinivas wat hadien ba ka la ujor pyrshah sha ki.
“Nga dei ka nongialam kynthei.Lada Ngan dang iai ngat ha kiba kum kine ki jingshah banbein, kumno Ngan lah ban aimynsiem bad pynshlur ia ki para kynthei ba kin pyniasoh sha ka seng Congress?” ka la buh jingkylli.
“Nga la shu sngap jar la bun bun bnai ban ap ia ki ba kin shim ia ki lad jingpynshitom pyrshah ia u, hynrei la iohi ba ym shym la don ba patiaw.U Srinivas ha ka rukom kum u nonglamktien u la leh ia shibun ki kam kiba ialam bakla.Kumno ba kum u nongialam un iai bteng ban niewbein bad banbor ia ka kynthei man la ka por? Kadei ka jingsngew jong ka Priyanka Gandhi ha kaba iadei bad ki lad jingiada na ka bynta ki kynthei,? ka la buh jingkylli.
Shuh shuh ka Angkita ka la ong, “U Srinivas u nang tharai ba u don ia ka bor kaba khlain bad ioh ia ka jingpyrto na ki nongialam kiba halor ba u lah ban banbor bad niewbein ia ka kynthei hapoh la ka jong ka kynhun.Haba u president barim ka IYC u Keshav Kumar u la kren tohmet bad banbein ia ki kynthei u la shah weng noh.Hynrei, mynta wat hapdeng ka jingshah banbor kaba la neh kumba hynriew bnai kynthih ha u Srinivas, la kyntu ia Nga ba Ngan sngap jar bad ym shym la pynlong satia ia kano kano ka jingtohkit.”
“Nga la ujor ruh sha u president ka APCC u Bhupen Bora ha kasba iadei bad kane ka phang.Hynrei u Bora u la ong ia u Srinivas ba um dei ban pynlong ia ka ilekshon,” ong shuh shuh katei ka nongialam Congress.
Ka la ong shuh shuh; “Mynta kin ujor da ka mukotduma baimynrian khmat pyrshah ia nga bad Nga pdiang sngewbha ia kane.Nga long kaba kloi ban ujor da ka mukotduma baimynrain khmat…Mynta, haba Nga ujor halor ki kam shah banbor kiba Nga la mad na ki nongialam ba halor ka party Congress, kila byrthen ia nga ban ujor da ka mukotduma baimynrian khmat. Ngan iakhun ia kane.”
Ka Angkita Dutta ka dei ka khun jong u Anjan Dutta ba la khlad noh uba dei ruh u Myntri ha ka sorkar jong u Tarun Gogoi ha Assam bad kaba khlieh i ka unit jong ka party ha ka jylla.
