Shillong, Iaiong 19 : Ka Shillong Cathedral Parish, Laitumkhrah kala kyntu ia ki riewngeit kiba leit Jingiaseng ba kin long kiba phikir bha iala ki jong ki kali ba ki pynieng ha ki jaka pynieng (Parking Lot) namar ka jingdon ki nongtuh kiba kyndang kali ban tuh ia ki tiar ki tar.
Ha ka video CCTV bala pyllait da ki borkhmih ka Parish, la iohi ba uwei u briew bym lah ban ithuh ula iaid swait ia kiba bun ki kali ba pynieng ha ka jaka pynieng kali jong ka Parish ha ka por ba long ha Holy Mass myn ha ka sngi U Blei.
Kane ka video ka pyni ia u briew uba pyrshang ban kyndang ia ki kali.
Kat kum ka khubor, une u juh u briew u dei uba ju wan manla ka sngi U Blei ha ka por ba long Jingiaseng Holy Mass. Ia kane ka video la pynsaphriang online ban pyni ia ki paidbah bad ban kyntu ba kin phikir iala ki kali namar kiba don bun ki jingjia ba shah kyndang ki kali ha kane ka jaka pynieng kali ka Parish.
Hadien ba shong bishar ia kane ka video, ki bor khmih ka Parish kila ujor da ka ejahar sha ka Laitumkhrah Police Station pyrshah ia une u briew bym lah ban ithuh.
Ki Pulit kila pynlong ia ka jingtohkit ban lah pynithuh bad ban kem ia une u briew.
Pule lang ia kane: Hiar jurip u CM ia ki madan ialehkai phutbol ba dang kyntiew kyrdan ha Polo
