Shillong, Iaiong 05: Ka Harijan Panchayat Committee (HPC) hynne ka sngi kala shim iaka rai ban iakynduh iaka sorkar jylla haka 10 tarik mynta u bnai halor ka jingthmu jong ka sorkar ban pynkynriah noh ia ki 342 tylli ki Longiing kiba sah ha Them Iew Mawlong shaka ki quarter jong ka Shillong Municipal Board (SMB) kaba don ha Bivar Road.
Ia kane la pyntip da u Secretary ka HPC u Gurujit Singh uba la iathuh ba ia kane ka rai ban iakynduh iaka sorkar jylla la shim hadien ka jingialang jong baroh kiba sah ha Them Iew Mawlong ka ba long hynne ka sngi .
U Gurujit ula iathuh ba ka HPC ka la pynkhreh ruh ia ka jubab halor ka Blueprint bala phah daka sorkar sha ka HPC, kaba tyrwa ban pynkynriah noh ia ki 342 tylli ki longiing na Them Metor.
“Mynta ka sngi, haka jingialang hapdeng kiba sah ha Them Iew Mawlong, ka HPC kala dep ban pule ne bishar bniah iaka Blueprint bala phah daka sorkar bad ha ka 10 tarik mynta u bnai ngin saleit iakynduh iaka sorkar ban jubab halor kane ka jingthmu ban pynkynriah noh ia ngi sha kawei pat ka jaka” ong u Gurujit.
U Gurujit ula ong ba ka jingiakynduh khatduh hapdeng ka HPC bad ka sorkar kadei ha ka 29 tarik Nailur 2022 bad haduh mynta ka sorkar ruh kam shym la khot iakren iaki hynrei kala shu phah jubab tang iaka Blueprint bala phah shaka HPC.
Ula bynrap ba haduh mynta ka HPC ne ki paidbah ba sah ha Them Iew Mawlong kim don jingtip halor kita kiba sah beaiñ bad ia kane ruh la pynksan hi da Symbud Myntri Rangbah ka jylla bah Prestone Tynsong ba ym don wat tang kawei ka Longiing kaba shong beaiñ ha Them Iew Mawlong.
Pule lang ia kane: Iakynduh ka HYC ia u DMHO ba kynnoh kren tohmet ka Doktor ia u Nongpang ha Civil Hospital
