Nongpoh,Iaiong05 : Ka seng Hynniewtrep Youth Council-Ri-Bhoi, hynne ka sngi Balang ala leit iakynduh ia u District Medical & Health Officer (DMHO) ka District bad ia u Medical Superintendent ka Civil Hospital Nongpoh, ban ujor halor ka jingkynnoh kren tohmet jong kawei ka doktor pyrshah ia u Nongpang uba leit wad jingsumar na kane ka hospital sorkar.
Ka HYC-Ri-Bhoi bala ialam da u General Secretary Tony Shylla, kala kynnoh ba kane ka jingshah kren tohmet u nongpang kala jia ha ka miet 30 tarik Lber 2023.
Ha ka jingiakynduh ia u DMHO Dr P Kharnarry bad MS Dr N Sangma, ka HYC kala pyntip ba une u nongpang u dei uba don hapdeng ka jingshitom kaba jur hynrei ula shah kren tohmet ha kane ka doktor katba u dang leit wad jingsumar ha katei ka miet.
Haba iakren bad ki nongthoh khubor, u samla Tony u pyntip ba ka seng kala ioh ia ka jingujor na une u nongpang u bym sngew lah kun shuh ia ka jingshah kren ha kane ka doktor. U kynnoh ruh ba kane ka jingshah kren tohmet jong ki nongpang ka dei kaba ju jia naka por sha ka por ha kane ka jaka ai jingsumar ha Nongpoh.
Haba kylli,u iathuh ba hadien ka jingiakren bad ki bor pyniaid ka Hospital, la ioh jingpynshai ba ka jingkren tohmet jong kane ka doktor ka dei namar ba ka don hapdeng ka jingbunkam bad ba ka don tang marwei ban peit bad khmih ia ki nongpang ha katei ka miet.
Une u Nongialam ka HYC u iathuh ba kane ka doktor kala pan map hakhmat une u nongpang uba la iadonlang bad ki dkhot ka HYC.
U samla Tony ula kyntu ia baroh ki Nongtrei ha ki jaka ai jingsumar ba kum ki briew ki ba dei ai jingsumar ia ki nongpang, kam ju dei ban kren tohmet ne leh tohmet haba ai ka jingshakri ia ki nongpang.
Ula pyntip ba ka HYC-RI-Bhoi kan sap hah da ka jingthoh sha ka Sorkar ba kan pynbun ia ki nongtrei ha ki jaka ai jingsumar khamtam ki doktor kiban ai jingshakri mynmiet khnang ba kan nym mih shuh kum kine ki jingjia hadien habud.
