Shillong, Iaiong 03 : Ka Iingkashari Meghalaya High Court hynne ka sngi nyngkong kala ong ba naduh u snem aiu baka Roster System kan sdang treikam, kan dei ka kam kaba biang eh ban ieh ha ka Iingdorbar Thaw Ain bad ka bor synshar jong ka Jylla ban shim rai.
Ha ka hukum, ka Division Bench bala khlieh da u Chief Justice Sanjib Banerjee kala pynwai ia ka PIL bala mudui da u Greneth M Sangma khlem da shong bishar ia ka kam ba iadei bad ka Roster System jong ka jingai bhah ha ka Jylla bad ong “Ka Iingkashari ka lah ban khot bishar ia kane ka kam ha ka por kaba dei”.
Ka Iingkashari ka ong donkam ban shim ia ka judicial notice halor ka jingiatai ia ka kam ba iadei bad ka Roster ha ka Iingdorbar Thaw Ain ba thymmai ka Jylla.
“Hynrei, kam shym la paw satia ba kan don ka jingiatai halor u snem ot kyrteng (cut off-date) lane haduh u snem aiu baka Roster Roster kan sdang ban treikam. Kine ki dei ki kam kiba biang eh ban ieh ha ka Iingdorbar Thaw Ain bad ka bor Synshar ka Jylla bad hadien ba kila shim rai, kan sa plie lad ia ki Nongshongshnong ba shah ktah ba kin buh jingkylli kat kum ki lynti ka Ain” kala ong haba bynrap “Ia mynta, bad khlem da shim rai ia kane ka kam bad ba kala don ka jingiatai hapoh ka Iingdorbar Thaw Ain, ym dei shuh ban shong bishar ia kane ka mukotduma ba mynta”.
Ka Iingkashari ka ong ruh ba kane ka mukotduma, kaba la ujor kum ka Public Interest, ka paw kum ka jingpyrshang ban nang pynktieh ia ka umktieh.
Ka hukum ka ong ba kala shem ha u snem 2022 ha ka jingbishar ia kane ka kam, ba ka Reservation Policy kala don ha Jylla naduh ba ioh Jylla pura kata naduh u Kyllalyngkot 1972 hynrei kam shym don pat ka jingpynkhreh ia ka Roster.
Namar kata, ka Iingkasahri kala shim ia ka suo muto case ia kane ka jingle bakla bad la pynsangeh ia baroh ki jingthungkam tad haduh bala dep pynkhreh ia ka roster.
