Shillong, Iaiong 03: Kum shi bynta jong ka jingrakhe dap 10 snem, ka kynhun Faith Foundation kaba don ha nongbah Shillong kala sdang pyntreikam iaka “My Safe” Campaign hynne ka sngi Nyngkong ha Meadow Hall, Shillong.
Ka Faith Foundation (FF), kadei ka kynhun kaba kynthup ia ki longkmie kiba dei ki Khasi, kiba trei naka bynta ka bha ka miat bad ka jingshngain jong ki khynnah bad ki samla ba dang khie san naduh u snem 2013.
Kawei na ki nongseng jong katei ka kynhun kaba long ruh ka Director jong ka Faith Foundation, ka Kong Shannon Dona Massar, haba iakren bad ki nonbgthoh khubor kala ong, ba ha kine ki 10 snem kiba la dep, ka Foundation kala trei ha ki skul ban ai jingnang jingtip ia ki khynnah halor ka phang kaba iadei bad ka rukom ktah kaba bha bad ka rukom ktah kaba sniew ne ka “safe and unsafe” touches.
“Ngi sngew ba ki khynnah ki donkam ban tip, donkam ban sngewthuh khnang ba kin lah ban iada ialade” ong ka Kong Massar bad ka bynrap, ba ki khynnah ki donkam ban tip ba kidei ban pyntip haba don kum kitei ki jingjia iano iano ruh.
Kala ong, ba kaba bun hi ka jingjia ba ki khynnah ki shah leh khlem akor kidei kiba jia bha hapoh iing.
Ka kong Massar kala kyntu iaka sorkar ba kan pdiang bad ban pyntreikam noh iaka “Personal Safety education” ha baroh ki skul kiba don hapoh ka jylla.
Ka Faith Foundation kala trei ruh ha kaban lap bad ithuh ia kiba bun ki mat bad ki jingeh kaba ki khynnah ki mad bad ban shim ia kilad ki lynti kumno ban pyrshang ban iarap lem ia ki ha kaba iadei bad ka pule ka puthi jong ki.
Lah ban kdew ba ka Faith Foundation dang shen kala ioh iaka Rovert D. Stillman Dignity Award 2023 na ka Global Fund for Children kum shi bynta jong ka jingithuh iaki kam kiba kala trei ha kine ki 10 snem kiba la leit.
